JAK ŞİRAK MİLLƏTLƏ VİDALAŞMIŞDIR
AZƏRTAC “RİA Novosti” agentliyinə istinadla xəbər verir ki, mayın 16-da səlahiyyət müddəti başa çatmış Fransa Prezidenti Jak Şirak bir gün əvvəl televiziya ilə millətə müraciət edərək, onunla vidalaşmışdır. O demişdir: “Sizin adınızdan icra etdiyim səlahiyyətlərimi sabah yeni Prezident Sarkoziyə təhvil verəcəyəm. Mən bunu yerinə yetirdiyim vəzifədən qürur və ölkəmizin gələcəyinə inam hissi ilə edəcəyəm”.
Şirak müraciətində həmvətənlərini irəliləyişin rəhni olan birliyi və həmrəyliyi həmişə qorumağa çağırmışdır. O demişdir: “Fransa seçdiyi yolla vahid bir qüvvə kimi irəliləyişini davam etdirərək, tərəqqi və çiçəklənmə nümunəsi, bərabər imkanlar və həmrəylik vətəni, Avropa quruculuğunun mühərriki və sülh, inkişaf, ekologiya kimi çağırışlara cavablar axtarışında ön sıralarda duran bir ölkə kimi təsdiqini tapacaqdır”.
J.Şirak mədəniyyətlərarası dialoqu və sabit inkişafın təminatına dair üzərinə götürdüyü öhdəlikləri ictimai vəzifəsində davam etdirəcəkdir. İstefaya getmiş digər dövlət başçıları kimi, Jak Şirak da bu məqsədlə öz şəxsi fondunu yaratmaq fikrindədir. Sonda J.Şirak ən tələbkar və gözəl millət olan fransızlara, xidmət missiyasını həyata keçirməkdə varisi Sarkoziyə uğurlar arzulamış və bütün həmvətənlərini Fransa ilə fəxr etməyə çağırmışdır.
Bölmənin digər xəbərləri
