CƏMİYYƏT
Kadr islahatları ölkəmizin bütün sahələrdəki inkişafında mühüm əhəmiyyət kəsb edir
Bakı, 22 fevral, AZƏRTAC
Prezident İlham Əliyevin rəhbərliyi ilə ölkəmizdə həyata keçirilən genişmiqyaslı islahatlar, uğurlu inkişaf siyasəti bütün sahələrdə özünü büruzə verir. İslahatlarda əsas məqsəd ölkəmizin dünya birliyinə daha yaxından inteqrasiyası, idarəetmədə əsaslı dəyişikliyin, yeniliyin və çevikliyin yaradılması, əhalinin rifahının daha da yüksəldilməsidir. Bütün bunların həyata keçirilməsi üçün kadr siyasəti də önəmli rol oynayır. Dövlət idarəçiliyi sisteminin təkmilləşdirilməsi istiqamətində atılan addımlar zamanı kadr seçimində, ilk növbədə, xalqın və dövlətin maraqları, milli mənafelər nəzərə alınır. Son illər bu istiqamətdə həyata keçirilən struktur islahatları ölkəmizin inkişafında, eləcə də korrupsiyaya və rüşvətxorluğa qarşı mübarizədə mühüm rol oynayıb.
Bu fikirləri AZƏRTAC-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə söyləyib.
Son illər kadr siyasətində aparılan islahatların əhali tərəfindən rəğbətlə qarşılandığını vurğulayan hüquq müdafiəçisi qeyd edib ki, struktur islahatları çərçivəsində gənc kadrların rəhbər vəzifələrə irəli çəkilməsi rəğbətlə qarşılanır. Bu uğurlu islahat, eyni zamanda, korrupsiya və rüşvətxorluğa qarşı aparılan mübarizədə də öz müsbət təsirini göstərir. Prezident İlham Əliyevin kadr islahatlarını, idarəetmədə modern strukturun yaradılmasını, bu sahənin təkmilləşdirilməsini daim diqqət mərkəzində saxlayıb. Aparılan struktur və kadr islahatları həm də iqtisadiyyatımızın güclənməsinə, regionların sosial-iqtisadi inkişafının daha da sürətlənməsinə yol açır. Dövlətimizin başçısı vəzifəyə yeni təyin etdiyi kadrların qarşısında ciddi məsələlər qoyur. Əsas tələblərdən biri də xalqın xidmətçisi olmaq, vətəndaşlarla təmas platformasını genişləndirməkdir. Ölkə rəhbərinin kadr siyasəti məhz həmin prinsiplər əsasında qurulur. Dövlətimizin başçısı rayonlara yeni təyin etdiyi kadrlar qarşısında prioritet vəzifə qoyur, rüşvətxorluğa və korrupsiyaya meyil edən məmurların ən sərt şəkildə cəzalandırılacağını bəyan edir. Son illər bir sıra icra hakimiyyətlərində, nazirlik və komitələrdə aparılan əsaslı yoxlamalar da bunu təsdiqləyir.
Dövlətimizin başçısı yeni təyin etdiyi kadrlara tövsiyə olaraq tapşırır: “Mən əldə edilmiş uğurlar haqqında həmişə danışmağa hazıram və fəxr ediləsi məsələlər kifayət qədər çoxdur. Ancaq mən həmişə, necə deyərlər, narazı oluram. Çünki mən istəyirəm ki, daha yaxşı olsun... Harada ki, mümkündür, biz maksimum dərəcədə öz imkanlarımızdan istifadə edək ki, işlər daha da yaxşı getsin. Ona görə kadr islahatı da bu məqsədi daşıyır”.
Ç.Qənizadə bildirib ki, artıq ölkəmizdə yeni dövr başlayıb. Həm kadr islahatları, həm də Ermənistan üzərində qazandığımız parlaq Qələbə yeni reallıqlar yaradıb. Bu inkişaf tendensiyasının qorunub saxlanılmasında dövlətimizin başçısının polad iradəsi, qətiyyəti, uzaqgörənliyi mühüm rol oynayır. Prezident İlham Əliyevin bu günlərdə daha üç rayona yeni təyin olunmuş icra hakimiyyətinin başçılarını videoformatda qəbul edərkən sələndirdiyi fikirlər də bunu təsdiqləyir: “Siz daim insanlarla təmasda olmalısınız, onların problemlərini onlardan eşitməlisiniz, laqeyd olmamalısınız. Yəni, bütün məmurlar qarşısında mənim tərəfimdən qoyulan vəzifələr bundan ibarətdir. Çünki hər bir dövlət məmuru Prezident başda olmaq şərti ilə xalqın xidmətçisidir. Mən bunu dəfələrlə öz çıxışlarımda demişəm və icra başçılarını vəzifəyə təyin edərkən demişəm”.
Hüquq müdafiəçisi dövlətimizin başçısının korrupsiya və rüşvətxorluğa meyilli olan dövlət məmurlara bir daha sərt mesaj göndərdiyini və belə şəxslərin ciddi cəzalandırıldığını, bundan sonra da qanun qarşısında cavab verəcəklərini xatırladaraq deyib: “Əfsuslar olsun ki, bəzi hallarda mənim təyin etdiyim vəzifəli şəxslər öz vəzifə borcunu yerinə yetirmək əvəzinə qanunsuz işlərlə məşğul idi, korrupsiya ilə, rüşvətxorluqla məşğul idi. Kasıb insanların malına göz dikmişdilər, dövlət tərəfindən ictimai işlərə cəlb edilən insanların maaşını mənimsəmişdilər. Bu vicdansızlıq və əxlaqsızlıq nəticəsiz qalmadı. Bildiyiniz kimi, bir çox icra başçıları cinayət məsuliyyətinə cəlb olunub, artıq bir çoxu məhkum edilib və bəzilərinin cinayət işlərinin istintaqı davam edir”.
Ç.Qənizadə belə cəza alanların təkcə icra hakimiyyəti başçılarına deyil, bütün məmurlara aid olduğunu bildirib. Son vaxtlar bir sıra rayonların icra hakimiyyətləri ilə yanaşı, bəzi nazirliklərdə də ciddi yoxlamaların aparıldığını xatırladıb və qeyd edib ki, heç kim qanundan yuxarı ola bilməz. Qanun qarşısında hamı bərabərdir. Dövlətimizin başçısının qeyd etdiyi kimi, dövlət məmurunun üzərinə düşən vəzifə və məsuliyyət onları dediyim prinsiplərə riayət etmələrinə sövq etməlidir: “Əks təqdirdə, onlar cəzalandırılacaq və artıq gördüyümüz işlər bunu təsdiqləyir. Böyük vəzifə böyük imtiyaz deyil, böyük məsuliyyətdir. Ona görə bu məsuliyyəti dərk edərkən siz öz addımlarınızı da bu istiqamətdə atmalısınız”.