KAMİL MÜSEYİB OĞLU ƏLİYEV
Azərbaycan mədəniyyətinə və incəsənətinə ağır itki üz vermişdir. Müasir Azərbaycan xalça rəssamlığı sənətinin görkəmli nümayəndəsi, Azərbaycan Respublikası Prezidentinin fərdi təqaüdçüsü, xalq rəssamı Kamil Müseyib oğlu Əliyev 2005-ci il martın 1-də ömrünün 84-cü ilində vəfat etmişdir.
Kamil Əliyev 1921-ci il oktyabrın 22-də İrəvan şəhərində anadan olmuşdur. O, 1936-cı ildə Bakı Rəssamlıq Məktəbinə daxil olmuş və eyni zamanda “Azərxalça” birliyində köçürücü rəssam işləmişdir. 1941-ci ildə könüllü olaraq orduya yazılan Kamil Əliyev Gürcüstandakı komandirlər məktəbində təlim keçdikdən sonra cəbhəyə yollanmış, Maykopdan Berlinə qədər şərəfli döyüş yolu keçmişdir. O, 1945-1946-cı illərdə SSRİ-nin Almaniyadakı ilhaq qrupunda bölmə komandiri olmuşdur.
Müharibədən sonrakı illərdə Kamil Əliyev rəssamlıq fəaliyyəti ilə məşğul olmuş, 1954-cü ildə “Soyuz-Torq reklam”ın baş direktoru və baş rəssamı təyin olunmuş, 1961-ci ildə Bədii Fondun Yaradıcı-İstehsalat Kombinatının direktoru, 1964-1971-ci illərdə Bakı Zərgərlik Fabrikinin direktoru, 1971-ci ildə isə Yerli Sənaye Nazirliyinin İstehsalat şöbəsinin müdiri işləmişdir. O, 1993-cü ildən ömrünün sonunadək “Azərxalça” Elm-İstehsalat Birliyinin baş direktoru olmuşdur.
Kamil Əliyev bütün ömrünü xalqımızın mədəniyyəti tarixində mühüm yer tutan xalçaçılıq sənətinin qədim, zəngin ənənələrinin qorunub saxlanılmasına və inkişaf etdirilməsinə həsr etmiş böyük rəssam kimi tanınmışdır.
Rəssamın çeşniləri əsasında toxunmuş xalçalar süjet və ornament rəngarəngliyi ilə səciyyələnir, əsrlər boyu Azərbaycanda formalaşmış xalçaçılıq məktəblərinin xüsusiyyətlərini vahid kompozisiya ətrafında birləşdirir. Onlarda xalqımızın mənəvi aləmi - xarakteri, estetikası və həyat fəlsəfəsi, Azərbaycan təbiətinin füsunkar gözəllikləri öz parlaq təcəssümünü tapır.
Tanınmış rəssamın xalqımızın qüdrətli söz dühalarına, eləcə də görkəmli dövlət xadimlərinə həsr etdiyi portret-xalçalar həqiqi sənət zirvəsinə yüksəlmiş, Azərbaycanın milli sərvəti kimi incəsənətimizin qızıl fonduna həmişəlik daxil olmuşdur. Onun xalq sənətinin mürəkkəb bədii ifadə vasitələrindən böyük ustalıqla istifadə edərək hazırladığı portretlər öz orijinallığı, monumentallığı və yüksək texniki üslubu ilə seçilir. Milli ornament və xalçaçılıq sənətinin özünəməxsus səhifəsini təşkil edən bu əsərlər dünyanın bir çox ölkələrində uğurla nümayiş etdirilərək, Azərbaycan xalçasının şöhrətini daha da artırmışdır.
Kamil Əliyevin bacarıqlı təşkilatçı kimi fəaliyyəti də təqdirəlayiqdir. Onun uzun illər rəhbəri olduğu “Azərxalça” Elm-İstehsalat Birliyinin kollektivi qədim kökləri olan xalq sənətini bu gün də uğurla yaşadıb inkişaf etdirir.
Kamil Əliyevin yaradıcılığı həmişə diqqət mərkəzində olmuş və yüksək qiymətləndirilmişdir. O, 1968-ci ildə əməkdar rəssam, 1980-ci ildə xalq rəssamı adına layiq görülmüşdür. Rəssamın müstəqil respublikamızın ən ali mükafatı - “İstiqlal” ordeni ilə təltif olunması onun sənətinə və şəxsiyyətinə ehtiramın parlaq ifadəsidir.
Böyük sənətkar, əsil ziyalı və qayğıkeş insan Kamil Müseyib oğlu Əliyevin işıqlı xatirəsi xalqımızın qəlbində daim yaşayacaqdır.
Allah rəhmət eləsin!
İlham Əliyev, Murtuz Ələsgərov,
Artur Rasizadə, Ramiz Mehdiyev,
Elçin Əfəndiyev, Mahmud Kərimov,
Hacıbala Abutalıbov, Fatma Abdullazadə,
Polad Bülbüloğlu, Nizami Xudiyev,
Fərhad Xəlilov, Tahir Salahov,
Anar Rzayev, Ömər Eldarov,
Böyükağa Mirzəzadə, Toğrul Nərimanbəyov,
Oqtay Sadıxzadə, Rasim Əfəndiyev,
Tokay Məmmədov, Nadir Əbdürrəhmanov,
Kamil Nəcəfzadə
X X X
Mərhumun cənazəsi vidalaşmaq üçün 2005-ci il martın 2-də saat 13.00-dan 15.00-dək Şəhriyar adına Bakı Mədəniyyət Mərkəzində (Rəşid Behbudov küçəsi, 3) qoyulacaqdır.
Dəfn mərasimi Fəxri xiyabanda keçiriləcəkdir.
Bölmənin digər xəbərləri
