Ke Ketszin: Azərbaycan Çini Avropa bazarına bağlayan əvəzsiz körpüyə çevrilib
Bakı, 9 sentyabr, AZƏRTAC
Azərbaycanın nəqliyyat və tranzit imkanları onu Avrasiya qitəsinin mühüm dövlətinə çevirib və onun əhəmiyyəti getdikcə artır. Çin-Avropa Dəmir Yolu Ekspresi “Bir kəmər, bir yol” təşəbbüsünün əlamətdar nailiyyətidir.
AZƏRTAC xəbər verir ki, bu sözləri Çinin Çjetszyan qubernatorunun müavini Ke Ketszin Çin-Avropa Dəmir Yolu Ekspres marşrutu 5 illiyi və Trans-Xəzər Beynəlxalq Nəqliyyat Marşrutundan keçən 237-ci qatarın (Yivu–Bakı) qarşılanma mərasimində çıxışı zamanı deyib.
Onun sözlərinə görə, Çindən Avropa, Mərkəzi Asiya və digər istiqamətlərə 24 müntəzəm marşrutlar var və ümumilikdə 14 mindən çox qatar hərəkət edir.
Qubernator müavini nəzərə çatdırıb ki, əyalətdən mallar Avrasiya qitəsinin 50-dən çox ölkəsinə və 160 şəhərinə tədarük olunur: “Əyalətdə 26 kateqoriyada 50 mindən çox məhsul ixrac olunur. Azərbaycan Trans-Xəzər Beynəlxalq Nəqliyyat Marşrutunun əsas qovşağıdır. Azərbaycan Çini Avropa bazarına bağlayan və beynəlxalq ticarət yollarının inkişafına güclü dəstək verən əvəzsiz körpüyə çevrilib”, - deyə K.Ketszin vurğulayıb.
Bölmənin digər xəbərləri
