Bakı, 6 dekabr, AZƏRTAC

Beynəlxalq Miqrasiya Təşkilatının (BMqT) Azərbaycan nümayəndəliyi Koreya Beynəlxalq Əməkdaşlıq Agentliyinin maliyyə dəstəyi ilə həyata keçirdiyi “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsinə həsr olunmuş “Kəhrizlər - su və həyat mənbəyidir” başlıqlı fotosərgi və konfrans keçirib.

Nümayəndəlikdən AZƏRTAC-a bildiriblər ki, tədbirdə bir sıra dövlət təşkilatlarının, BMT-nin Azərbaycandakı agentliklərinin, səfirliklərin, donor və tərəfdaş təşkilatların, təhsil və vətəndaş cəmiyyəti qurumlarının nümayəndələri, layihənin icra edildiyi rayonlardan icra hakimiyyəti təmsilçiləri, icma üzvləri, layihə mühəndisləri və kəhriz ustaları iştirak ediblər.

Tədbirdə çıxış edən BMqT-nin Azərbaycandakı nümayəndəliyinin rəhbəri Vladimir Qorjiyev, BMT-nin Azərbaycandakı rezident əlaqələndiricisi Vladanka Andreyeva və Koreya Beynəlxalq Əməkdaşlıq Agentliyinin ölkə üzrə direktoru Moon Jong Hyun tədbir iştirakçılarına kəhrizlərin bərpasını nəzərdə tutan layihənin insanlar üçün əhəmiyyətindən danışıblar.

Vladimir Qyorqiyev BMqT-nin Azərbaycan nümayəndəliyinin layihəsinin ətraf mühit üzrə ən nüfuzlu mükafat sayılan “Qlobal Enerji” mükafatının 2021-ci il üzrə milli qalibi seçilməsinin bu layihənin insanlar və ətraf mühitin davamlılığı üçün əhəmiyyətinin və vacibliyinin göstəricisi olduğunu qeyd edib. O kəhrizlərin bərpasında nümayəndəliyin dünyada ilk dəfə tətbiq etdiyi yeni texnoloji metodologiyanın önəmini diqqətə çatdıraraq deyib: “İnnovativ texnologiyanın tətbiqi ilə kəhrizlərin bərpası prosesi daha effektiv və təhlükəsiz olub. Bu innovativ kəhriz bərpası texnologiyası böyük potensiala malikdir və hətta Azərbaycanın hüdudlarından kənarda da yeni ekoloji su təchizatı sistemlərinin bərpası və tikintisində istifadə oluna bilər”.

Vladanka Andreyeva kəhrizlərin bərpası layihəsinin Azərbaycanın Dayanıqlı İnkişaf Məqsədlərinə çatmaq istiqamətində səylərinə töhfə verdiyini qeyd edərək kəhrizlərin bərpasının Azərbaycan üçün əhəmiyyətini vurğulayıb.

Sonra kəhrizlərin bərpasında tətbiq olunan yeni texnologiyaların işini əks etdirən film nümayiş olunub. Həmçinin layihə çərçivəsində fəaliyyəti əks etdirən fotoşəkillər, çap olunmuş kitab və nəşrlərdən ibarət sərgiyə baxış keçirilib.

Tədbirdə layihənin cari icrası ilə bağlı Azərbaycan və ingilis dilində hazırlanmış Azərbaycanda kəhrizlərin atlası, kəhrizlər üzrə milli baş planın, Azərbaycan Dövlət Aqrar Universitetinin nəzdində yaradılmış kəhriz informasiya və tədqiqat mərkəzi, universitetdə kəhriz mühəndislik kursunun tədrisi ilə bağlı təqdimatlar, həmçinin kəhrizlərin bərpasında çalışan ustaların və icma nümayəndələrinin çıxışları dinlənilib.

Qeyd edək ki, kəhrizlərin bərpası BMqT-nin Azərbaycanda həyata keçirdiyi ən mühüm layihələrdən biridir. Nümayəndəlik 1998-ci ildən etibarən Azərbaycanda kəhrizlərin bərpası ilə məşğuldur. Həmin vaxtdan Azərbaycanın müxtəlif bölgələrində layihələr çərçivəsində 166 kəhriz bərpa edilib. Nümayəndəlik hazırda KOICA-nın maliyyə dəstəyi ilə ənənəvi, dayanıqlı su təchizatı sistemi olan kəhrizlərin bərpası yolu ilə regionlardakı əhalinin təhlükəsiz və ardıcıl su təchizatı ilə təmin etmək üçün dörd illik layihəni həyata keçirir. Əvvəlki layihələr kimi, bu layihə də gender, idarəetmə və ətraf mühitin mühafizəsi kimi məsələlərə xüsusi diqqət yetirərək icma əsaslı yanaşmanı həyata keçirməyə davam edir.

Ümumilikdə, layihə Azərbaycanın BMT-nin Dayanıqlı İnkişaf Məqsədlərinin (DİM) prinsiplərini həyata keçirilməsi səylərinə bir sıra istiqamətlərdə töhfə verir. Bu istiqamətlərə yoxsulluğa son qoyulması və qida təhlükəsizliyinin təmin edilməsinə birbaşa təsiri olan ev təsərrüfatlarının daxili ehtiyacı və suvarma suyu ilə təmin edilməsi, qadınların imkanlarının artırılması və qərar vermə proseslərində iştirakının təmin olunması, aid olduqları icmalarda liderlik rollarının artırılması, ekoloji cəhətdən təmiz və dayanıqlı su təchizatı sistemlərinin bərpası, kəhrizlər və təhlükəsiz içməli suya əlçatanlığın gücləndirilməsi daxildir.