KƏND TƏSƏRRÜFATI İŞÇİLƏRİNƏ
Hörmətli kənd təsərrüfatı işçiləri!
Sizi - Azərbaycanın əməksevər insanlarını kənd təsərrüfatı işçiləri günü münasibətilə səmimi qəlbdən təbrik edirəm.
Ölkəmizdə kəndli əməyi bütün dövrlərdə şərəfli hesab edilməklə yanaşı, həm də ən yüksək diqqət və hörmətə layiq görülmüşdür. Kənd təsərrüfatının iqtisadiyyatımızın mühüm tərkib hissəsi kimi, böyük inkişaf yolu keçməsi bu sahədə çalışan işçilərin gərgin və fədakar əməyinin nəticəsidir.
Ümummilli liderimiz Heydər Əliyevin Azərbaycana rəhbərliyinin birinci dövründə - 70-80-ci illərdə aqrar sektorun inkişafına, kənd təsərrüfatı işçilərinin əməyinin qiymətləndirilməsinə xüsusi diqqət göstərilirdi. O dövrdə respublika rəhbərliyinin uzaqgörən siyasəti və böyük səyi nəticəsində ölkəmizdə aqrar-sənaye kompleksi sürətlə inkişaf etmişdir.
90-cı illərin əvvəllərində ölkəni bürümüş dərin tənəzzül iqtisadiyyatın digər sahələri kimi kənd təsərrüfatını da əhatə etmişdir. Aqrar-sənaye kompleksi tamamilə dağılmış və böyük inkişaf potensialı olan kənd təsərrüfatı ölkə iqtisadiyyatının zərərlə işləyən sektoruna çevrilmişdir.
Yalnız ümummilli lider Heydər Əliyevin Azərbaycanın siyasi rəhbərliyinə qayıdışından sonra bu sahədə əsaslı dönüş yarandı. 90-cı illərin ortalarında kənd təsərrüfatında köklü dəyişiklikləri nəzərdə tutan torpaq islahatları həyata keçirildi. Bu tədbirlər kənddə yeni iqtisadi münasibətlərin formalaşmasına, kəndlinin əməyə olan marağının artmasına şərait yaratdı.
Hazırda kənd təsərrüfatında özəl bölmənin payı 99,7 faizə çatır. Aqrar sektor keçid dövrünün sınaqlarına və çətinliklərinə baxmayaraq inkişaf edir, ölkənin ərzaq təminatı sahəsində çox mühüm strateji vəzifəni yerinə yetirir. Aqrar sahədə sahibkarlığın inkişafı kənddə orta təbəqənin formalaşması prosesinə təkan verir.
Ölkəmizdə iqtisadi inkişafın sürətlənməsi və maliyyə resurslarının artması aqrar sektorun dəstəklənməsi istiqamətində daha təsirli tədbirlərin görülməsi üçün əlavə imkanlar yaradır. Son beş ildə kənd təsərrüfatı üzrə əsas kapitala investisiyaların həcmi 7 dəfə, kredit qoyuluşları isə 8 dəfə artmışdır. Aqrar sahədə güzəştli kreditləşdirmə imkanlarının genişlənməsi, kənd təsərrüfatı istehsalçılarına subsidiyaların verilməsi, onların texnika, gübrə və kimyəvi vasitələrlə təminatının yaxşılaşdırılması öz müsbət nəticələrini göstərməkdədir.
Hazırda regionların, o cümlədən kəndlərin infrastrukturu, enerji təminatı yaxşılaşdırılır, yeni yollar, kommunikasiya xətləri çəkilir, sosial-mədəni obyektlərin tikintisi uğurla davam etdirilir. Görülən işlər kənd ərazilərində təkcə iqtisadi deyil, həm də sosial-ictimai fəallığın artması ilə müşayiət edilir.
Əhalinin ərzaqla etibarlı təminatına dair Dövlət proqramının qəbulu ilə Azərbaycanda aqrar islahatların yeni mərhələsinə başlayırıq. Bu proqram həm də dövlətin kənd təsərrüfatına, kəndə və kəndliyə münasibətini əks etdirir. Biz aqrar sektorda istehsal həcmini artırmaqla yanaşı, bu sahədə yüksək məhsuldarlığa və səmərəliliyə, qabaqcıl texnologiyaların tətbiqinə, emal müəssisələri şəbəkəsinin genişləndirilməsinə, ən əsası isə, yerli məhsullarımızın rəqabət qabiliyyətinin artırılmasına nail olmalıyıq.
Dövlət kənd təsərrüfatı istehsalçılarının maraqlarına xidmət edən iqtisadi siyasəti bundan sonra da davam etdirəcəkdir. Aqrar sektorun inkişafına mane olan amillər ardıcıl tədbirlər nəticəsində aradan qaldırılacaq, onun maliyyə təminatı və kreditləşdirilməsi mexanizmi təkmilləşdiriləcəkdir. Kənd təsərrüfatı məhsulları istehsalçıları üçün tətbiq edilən vergi güzəştləri müddətinin uzadılması da nəzərdə tutulur.
İnanıram ki, regionların inkişafı, işsizliyin və yoxsulluğun azaldılması, ərzaq təminatı sahəsində reallaşdırılan proqramlar kənd əməkçilərinin həyatında müsbət dəyişiklikləri daha da dərinləşdirəcəkdir. Biz aqrar sektorun inkişafı istiqamətində bütün imkanlarımızı səfərbər etməklə yanaşı, kənd təsərrüfatı istehsalçılarından da keyfiyyətli məhsul, mütərəqqi təsərrüfatçılıq vərdişləri, yüksək işgüzarlıq və təşəbbüskarlıq gözləyirik.
Kənd təsərrüfatı yalnız iqtisadi fəaliyyət növü deyildir. O, həm həyat tərzi, həm də xalqımızın uzun illərdən bəri yaşatdığı təsərrüfatçılıq ənənəsidir. Bu ənənəni yeni nəslə ötürmüş, çoxillik bilik və təcrübələrini onlara öyrətmiş kənd təsərrüfatı işçilərinə, bütün ömrünü torpağa həsr etmiş veteranlarımıza fədakar əməklərinə görə təşəkkürümü bildirirəm.
Əminəm ki, bu peşə bayramını növbəti illərdə daha böyük nailiyyətlərlə qeyd edəcəyik. Sizi bir daha kənd təsərrüfatı işçiləri günü münasibətilə təbrik edir, fəaliyyətinizdə uğurlar arzulayıram.
İlham Əliyev
Azərbaycan Respublikasının Prezidenti
Bakı şəhəri, 30 oktyabr 2008-ci il.
Bölmənin digər xəbərləri
