Keyptaunda “Afrika Mədənçilik Həftəsi” keçiriləcək
Qahirə, 27 iyun, AZƏRTAC
Oktyabrın 1-dən 3-dək Cənubi Afrika Respublikasının Keyptaun şəhərində “Afrika Mədənçilik Həftəsi” keçiriləcək.
AZƏRTAC yerli mediaya istinadla xəbər verir ki, tədbir “İstehsaldan faydayadək. Afrikanın mineral zənginliyini aşkar etmək” şüarı ilə təşkil olunacaq. Tədbirdə 50-dən çox ölkənin yüksək səviyyəli nümayəndələrinin, nazirlərin, 300-dən çox qlobal şirkətin təmsilçilərinin iştirakı gözlənilir.
Həftə çərçivəsində Afrikada mədən sənayesi ilə bağlı bir sıra tədbirlər, o cümlədən strateji və texniki konfranslar, mədən investisiya habı və panel iclasları keçiriləcək. Sessiyalarda ABŞ-Afrika, Çin-Afrika, Avropa, Yaxın Şərq-Afrika tərəfdaşlıqlarında yeni çərçivələr müzakirə ediləcək.
Cənubi Afrika, Zambiya, Kongo Demokratik Respublikası və digər ölkələr öz təcrübələrini, inkişaf planlarını təqdim edəcəklər. İnvestorlar üçün yeni strateji təşəbbüslər və mədənçilik sahəsinin müxtəlif aspektləri müzakirə olunacaq.
Tədbirdə mineralların işlənməsi, dəyər əlavə edilməsi və inklüziv iqtisadi inkişaf sahəsində yeniliklər təqdim olunacaq.
Qeyd edək ki, ən böyük platin istehsalçısı olan Cənubi Afrika dünya üzrə bu metalın bilinən ehtiyatlarının 80 faizindən çoxuna malikdir. Zambiya Afrikanın ən böyük ikinci mis ixracatçısıdır. Bu ölkə 2031-ci ilədək ixracatını illik 3 milyon tona çatdırmağı planlaşdırır. Afrikanın aparıcı mis istehsalçısı olan Konqo Demokratik Respublikası həm də dünyanın ən böyük kobalt təminatçısıdır.
Bölmənin digər xəbərləri
