KİYEV AVROPA GÜNÜNÜ BAYRAM EDİR
AZƏRTAC-ın xüsusi müxbiri xəbər verir ki, mayın 11-də Kiyevdə Avropa Günü bayramı çərçivəsində Kreşsatik küçəsində “Avropa şəhərciyi” açılmışdır. Bu il Ukrayna paytaxtında Avropa Günü altıncı dəfə qeyd olunmuşdur.
“Şəhərcikdə” 28 ölkə: Avropa İttifaqının 24 üzvü, Aİ-yə namizəd ölkələr - Türkiyə, Xorvatiya, Makedoniya, habelə Ukrayna təmsil edilmişlər. Hər bir səfirlik buraya gələnlərə ölkəsinin coğrafiyası, ənənələri, mədəniyyəti, incəsənəti, milli mətbəxi ilə tanış olmağı təklif etmişdir.
Açıq müzakirələr pavilyonlarında Avropa biznes-assosiasiyasının təşkil etdiyi aktual siyasi və iqtisadi problemlərin müzakirələri olmuşdur. Ənənəvi olaraq, iki Avropa dilləri məktəbi fəaliyyət göstərmişdir.
“Şəhərciyin” işi sona çatdıqdan sonra Maydan Nezalejnostidə (Müstəqillik Meydanında) Avropa Günü bayramının rəsmi açılışı və rok-konsert olmuşdur. Kiyev səmasına beş min rəngli şar buraxılmışdır.
Bölmənin digər xəbərləri
