“KLASSİKİN BAŞI” FİLMİ NÜMAYİŞ ETDİRİLMİŞDİR
Əvvəlcə, aktyor Sergey Batalov filmin çəkiliş prosesi, aktyorları barədə məlumat vermişdir.
Quruluşçu rejissor, Rusiyanın xalq artisti Valeri Lonskoyun lentə aldığı filmdə SSRİ Xalq Komissarları Soveti yanında Birləşmiş Dövlət Siyasi İdarəsinin (1922-1934-cü illər) müstəntiqi Bulanovun Qoqolun cənazəsinin bir qəbiristandan çıxarıb başqa qəbiristanda dəfn edilməsi prosedurunu izləmək əmri aldığı göstərilir. Səbəb isə sadədir. Qoqol monastır qəbiristanında dəfn olunmuşdu, indi isə həmin monastırı dinlə amansız mübarizə aparan “yuxarılar”ın əmri ilə bağlayır və qəbiristanı dağıdırlar. Doğrudur, Qoqolun cənazəsini, hər halda, saxlamağı qərara alırlar. Yazıçının qəbiri açılanda məlum olur ki, cənazə yerindədir, amma başsızdır.
Filmin əsasını da Qoqolun başının axtarışı ilə bağlı hadisələr təşkil edir. Hadisələr paralel olaraq iki dövrdə - ötən əsrin 30-cu illərində və bizim kəşməkəşli zəmanəmizdə cərəyan edir.
Rollarda Dmitri Ulyanov, Dmitri Orlov, Lev Borisov, Olqa Litvinova, Anjelika Nevolina, Sergey Batalov və başqaları çəkilmişlər.
Filmin quruluşçu operatoru Aleksandr A.Demidov, quruluşçu rəssamı Oleq Smarovskiydir.
Bölmənin digər xəbərləri
