KODORİ DƏRƏSİNDƏ VƏZİYYƏT
Gürcü-abxaz münaqişəsi zonasındakı kollektiv sülhməramlı qüvvələr (KSMQ) qərargahının nümayəndəsi Suxumidən İTAR-TASS-ın müxbirinə telefonla bildirmişdir ki, Kodori dərəsinin yuxarı hissəsində yerləşdirilmiş əlavə müşahidə postu naməlum şəxslər tərəfindən bir neçə dəfə atəşə tutulmuşdur.
Onun dediyinə görə, posta atəş açmış quldurların sayı 250-300 nəfər olmuşdur. Sülhməramlılar postun yaxınlığındakı dağlıq-meşəlik sahədə düzəldilmiş sığınacaqlardan atəşə tutulmuşlar. Rusiya sülhməramlıları arasında tələfat yoxdur.
İTAR-TASS-ın yaydığı məlumata görə, MDB-nin kollektiv sülhməramlı qüvvələrinin Kvemo Acara yaşayış məntəqəsi yaxınlığındakı 78 nəfərdən ibarət yeni postu 2 aprel tarixli gürcü-abxaz protokoluna uyğun olaraq və KSMQ komandanının BMT missiyası ilə razılaşdırılmış qərarına əsasən yaradılmışdır.
Buna baxmayaraq, Rusiya sülhməramlılarının oraya gətirilməsi Tbilisidə etiraz doğurmuşdur. Gürcüstan Prezidenti Eduard Şevardnadze Kodori dərəsinə getmişdir. O, gürcü-abxaz münaqişəsi zonasındakı kollektiv sülhməramlı qüvvələrinin komandanı general-mayor Aleksandr Yevteyevlə görüşdə sülhməramlı qüvvələrin hərəkətlərinin qanuni olduğunu etiraf etsə də, bu postun ləğv edilməsini istədiyini bildirmişdir,
Gürcüstanın xarici işlər naziri İrakli Menağarişvili də etirazını bildirmiş və demişdir ki, onun ölkəsi Rusiya ilə Gürcüstan arasında yeni çərçivə müqaviləsinin hazırlanmasına dair Tbilisidə aparılan danışıqları dayandırmışdır.
Rusiya quru qoşunları baş komandanının sülhməramlı qüvvələr üzrə müavini general-leytenant Valeri Yevneviç KSMQ-nin qərargahına gəlmişdir və bu bölgədə vəziyyətə şəxsən nəzarət edir.
Bölmənin digər xəbərləri
