Paris, 23 noyabr (AZƏRTAC). YUNESKO-da “Azərbaycan günü” ilə bağlı tədbirlərdə iştirak etmiş Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Parisdə bir sıra işgüzar görüşlər keçirmişdir.

Komitə sədri görüşlər barədə AZƏRTAC-ın xüsusi müxbirinə müsahibə vermişdir. O demişdir: 2007-ci ildə komitəmizlə Fransanın Ailə və Sosial Məsələləri qurumu arasında əməkdaşlıq barədə memorandum imzalamışıq. İki il ərzində memorandumla bağlı xeyli işlər görmüşük. Bu müddətdə fransız ekspertləri dəfələrlə ölkəmizə səfər etmiş, fəaliyyətimizlə yaxından tanış olmuş, bəzi dəyərli məsləhətlər vermişlər. Keçən ilin yayında Paris Yuxarı İnstansiya Məhkəməsinin prokuror müavini xanım Fransuaz Güyo səfəri zamanı hər iki tərəfi maraqlandıran məsələlər ətrafında geniş fikir mübadiləsi aparılmışdır.

Bu mənim Fransaya ikinci işgüzar səfərimdir. Fransanın ayrı-ayrı təşkilatlarının bizim sahə ilə bağlı zəngin təcrübəsi vardır. Onların arasında qadınlara qarşı zorakılıqla mübarizə mərkəzinin fəaliyyətini mən xüsusi qeyd etmək istəyirəm. Elə səfərin əsas məqsədi də bizim sahə ilə yaxın olan Fransa təşkilatlarının həmin təcrübəsindən istifadə etmək idi.

Səfər zamanı Gənclərin Məhkəmə Müdafiə İdarəsinin Qanunvericilik və Hüquqi İşlər bürosunun rəhbəri Bönüa Dekub, Xarici İşlər Nazirliyinin İnsan Hüquqları üzrə səfiri Fransua Zimörey, Demokratik İdarəetmə Missiyasının sədr müavini Beatris Ravanel , Gender Missiyası üzrə məsul Fanni Benedetti, Ailə və Həmrəylik üzrə Dövlət katibi Nadin Morano, “Qadınlar hüquqi və bərabərlik” idarəsinin İl-de Frans üzrə nümayəndəsi Vivyan Monye və digər rəsmi şəxslərlə görüşlər keçirdik, çətinlikdə olan qadınlar mərkəzi, 13-16 yaşlı uşaqlar üçün tərbiyə müəssisəsi, azyaşlılar üçün təcridxana ilə yaxından tanış olduq.

Mən qeyd etmək istəyirəm ki, Azərbaycanda bu istiqamətdə xeyli iş görülmüşdür. Görüşlərimizin əsas məqsədi fransız həmkarlarımızın bu sahədəki təcrübəsindən istifadə etməkdir. Onların əldə etdikləri təcrübə əsasında biz ölkəmizdə uşaqlar üçün belə sığınacaqların təşkil edilməsini qərara almışıq və yaxın vaxtlarda tərbiyəedici müəssisələrin yaranacağını mən tam əminliklə bildirirəm.

Fransanın Sosial Müdafiə Nazirliyinin nəzdindəki Ailə və Həmrəylik üzrə departament ayrı bir qurum kimi ailə problemləri ilə məşğul olur. Bu qurumun rəhbəri dövlət katibi Nadin Morano ilə görüşümüz maraqlı keçmişdir. Fransa tərəfi azərbaycanlı qadınlarla həmrəyliyk və əməkdaşlıq yaratmaqda maraqlı olduğunu ifadə etmişdir. Bu məqsədlə yaxın vaxtlarda Fransadan böyük nümayəndə heyətinin ölkəmizə səfəri gözlənilir. Nümayəndə heyətinin tərkibində Milli Assambleyanın deputatları, senatorlar, müxtəlif dövlət qurumlarının məsul şəxsləri, tanınmış biznesmen qadınlar olacaqdır. Onlar səfərləri zamanı Azərbaycanda tərəfdaş tapmağ və onlarla qadın və uşaq problemləri sahəsində əməkdaşlıq yaratmaq arzusunda olacaqlar. Onların yüksək səviyyədə görüşlər keçirmələrinə komitəmiz hərtərəfli yardım göstərəcəkdir.

Paris Yuxarı İnstansiya Məhkəməsinin prokuror müavini Fransuaz Güyonun rəhbərliyi altında qadın zorakılığı məsələsinə həsr olunmuş dəyirmi masada bir neçə təşkilatın nümayəndələri iştirak edirdilər. Hər iki ölkənin qadın, ailə və uşaqa problemləri ətrafında geniş müzakirələr apardıq. Bu sahədə ölkələrimiz arasında əlaqələrin genişləndirilməsinin və əməkdaşlığın inkişaf etdirilməsinin vacibliyi diqqətə çatdırıldı.

Keçirdiyimiz görüşlərdə Fransa tərəfinin ölkəmizə böyük maraq göstərdiyinin şahidi oldum.

Əsgər Əliyev

AZƏRTAC-ın xüsusi müxbiri

Paris