CƏMİYYƏT
Korrupsiyaya qarşı mübarizə sahəsində müxtəlif dövlət qurumları ilə imzalanan əməkdaşlıq memorandumları müsbət nəticə verir
Bakı, 9 oktyabr, AZƏRTAC
Korrupsiyaya qarşı mübarizə çox mühüm əhəmiyyət kəsb edir. Baş Prokuror yanında Korrupsiyaya Qarşı Mübarizə Baş İdarəsinin əsas məqsədlərindən, funksiyalarından biri ölkədə həyata keçirilən islahatlara daim dəstək olmaqdır. Korrupsiya cəmiyyətin inkişafına mənfi təsir göstərir. Korrupsiyaya qarşı mübarizə Prezident İlham Əliyevin həyata keçirdiyi siyasətin ən prioritet istiqamətlərindən biridir. Bu sahədə mübarizə yalnız ixtisaslaşmış qurum tərəfindən aparılsa da, bunun daha səmərəli olması üçün həmin qurum digər dövlət qurumları ilə daim əməkdaşlıq etməlidir. Birgə fəaliyyət, məqsəd və əməkdaşlıq olmadan korrupsiyaya qarşı mübarizənin səmərəsini görmək mümkün deyil.
AZƏRTAC xəbər verir ki, bu fikirləri Azərbaycan Respublikası baş prokurorunun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev deyib.
Kamran Əliyev qeyd edib ki, Baş Prokuror yanında Korrupsiyaya Qarşı Mübarizə Baş İdarəsi korrupsiyaya qarşı mübarizə baxımından vacib olan dövlət qurumları ilə bu sahədə əməkdaşlıq memorandumları imzalayıb. Qida Təhlükəsizliyi Agentliyi, Dövlət Şəhərsalma və Arxitektura Komitəsi ilə birgə memorandumlar artıq imzalanıb. Bu gün Kiçik və Orta Biznesin İnkişafı Agentliyi arasında əməkdaşlıqla bağlı memorandumun imzalanması çox vacibdir. İnanıram ki, memorandum bu iki qurum arasında gələcəkdə fəaliyyət planına çevriləcək. Müxtəlif qurumlarla imzalanan memorandumların müsbət nəticələrini biz görürük. Qida Təhlükəsizliyi Agentliyi ilə bağlı onlardan daxil olan məlumat əsasında əməliyyat tədbirləri həyata keçirilib, qanunsuzluqların qarşısı alınıb, cinayət işləri başlanıb və digər qabaqlayıcı tədbirlər görülüb. Bu yaxınlarda belə bir birgə əməliyyat olub və onun nəticəsi barədə yaxın vaxtlarda mətbuata açıqlama veriləcək.
Kamran Əliyev qeyd edib ki, eyni zamanda, Dövlət Şəhərsalma və Arxitektura Komitəsi
ilə bu yaxınlarda imzalanmış memorandum əsasında qanunsuz tikililərlə bağlı Baş İdarəyə artıq bir neçə məlumat daxil olub və cinayət işləri başlanıb. Hazırda istintaq aparılır. Gələcəkdə də qanunsuz fəaliyyətlərlə bağlı Baş İdarəyə məlumatlar daxil olarsa, zəruri tədbirlərin görülməsi təmin ediləcək.