LATVİYA SAXTA PULLARIN ARTACAĞINI PROQNOZLAŞDIRIR
Riqa, 22 yanvar (AZƏRTAC). LETA informasiya agentliyi xəbər verir ki, cari ildə Latviyada saxta kağız pulların və müxtəlif saxta sənədlərin hazırlanması halları artacaqdır. Bunu Latviya Dövlət Polisinin Kriminalistika İdarəsinin texniki ekspertiza şöbəsinin rəisi Elmar Berzinş “Biznes&Baltiya” qəzetinə verdiyi müsahibədə bildirmişdir.
Ekspertin fikrincə, buna səbəb maliyyə böhranı və onunla bağlı sosial gərginlikdir. Berzinş demişdir: “Artıq Latviyada yeni saxta dollarlar peyda olmuşdur. Avronun da hamısı Frankfurtdakı Avropa Mərkəzi Bankı tərəfindən çap olunmamışdır. Bundan əlavə, cari ildə saxta pasportlara və texniki baxış kağızlarına da rast gəlinəcəkdir. Hətta, 20 santimlik dəmir pullar da ştamplanır”. Berzinş onu da əlavə etmişdir ki, saxta məhsulların keyfiyyəti ildən-ilə artır.
Avropa ölkələrindən fərqli olaraq Latviyada fırıldaqçılar bir və iki latlıq saxta dəmir pullar kəsməyi üstün tuturlar.
Berzinış demişdir ki, dövriyyədə əsl dəmir pullardan seçilməyən saxta pullar peyda olmuşdur. Onların üzərindəki təsvirlər və ölçüləri əsl dəmir pullardan heç nə ilə fərqlənmir. Onları yalnız Latviya Bankının detektoru müəyyən edə bilir.
Bölmənin digər xəbərləri
