REGİONLAR
Lənkəran: müəllimlərin sentyabr konfransı uğurlardan doğan yüksək əhval-ruhiyyə ilə keçib
Lənkəran, 3 sentyabr, Bağır Əliyev, AZƏRTAC
Sentyabrın 3-də Lənkəran şəhərindəki Heydər Əliyev Mərkəzində müəllimlərin ənənəvi sentyabr konfransı keçirilib.
AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər.
Konfransda Lənkəran Şəhər Təhsil Şöbəsinin müdiri Şəhanə Əhmədovanın “2014-2015-ci tədris ilinin yekunları və yeni dərs ilində qarşıda duran vəzifələr” mövzusunda məruzəsi dinlənilib. O, rayonda təhsil müəssisələrinin maddi-texniki bazasının möhkəmləndirilməsi istiqamətində görülmüş işlərdən danışaraq bildirib ki, son 12 ildə Lənkəranda 36 məktəb binası, 4 məktəb üçün əlavə korpus tikilib, 4 məktəb ən yüksək standartlar səviyyəsində təmir edilib. Ötən il isə 10 məktəb binası tikilərək dərs ilinin əvvəlində istifadəyə verilib. Darquba kənd tam orta məktəbi üçün inşa edilmiş 180 şagird yerlik yeni bina isə yeni dərs ilində istifadəyə müəllim və şagirdlərin ixtiyarına veriləcək.
Məruzəçi ali məktəblərə növbəti qəbul imtahanlarının nəticələri haqqında məlumat verərək deyib ki, ötən tədris ilində rayonun ümumtəhsil məktəblərini bitirən 1869 məzundan 910 nəfəri ali məktəblərə qəbul olunmaq üçün sənəd verib və əvvəlki illərin məzunları ilə birlikdə 436 nəfər tələbə adını qazanıb. Onlardan 51 nəfəri 500-dən, 25 nəfəri 600-dən yuxarı bal toplayıb. Lənkəran şəhər 10 nömrəli tam orta məktəbin qızıl medalla bitirmiş Lalə Cəfərli ən yüksək nəticə göstərərək 690 balla Tibb Universitetinin müalicə işi fakültəsinə daxil olub.
Məruzə ətrafında müzakirələrdə Lənkəran şəhər xarici dillər təmayüllü gimnaziyanın direktoru, Əməkdar Müəllim Mənsur Ağayev, məzun Lalə Cəfərli, valideyn Rasim Bağırzadə çıxış ediblər.
Konfransda çıxış edən Təhsil Nazirliyinin məsul işçisi Mirbaba Babayev yeni dərs ilində qarşıda duran vəzifələrdən danışıb.
Lənkəran Şəhər İcra Hakimiyyətinin başçısı Taleh Qaraşov yeni dərs ilinin başlanması və qarşıdan gələn Bilik Günü münasibətilə təhsil işçilərini təbrik edib, yeni tədris ilində onlara uğurlar arzulayıb.
T.Qaraşov çıxışında Heydər Əliyev Fondunun “Yeniləşən Azərbaycana yeni məktəb!” layihəsinin uğurla icra edilməsindən, rayonda məktəb tikintisinin geniş vüsət almasından, Prezident İlham Əliyev tərəfindən qarşıya qoyulan vəzifələrin Lənkəranda uğurla icra edilməsindən, rayonun ictimai-siyasi həyatında müəllimlərin və ziyalıların rolundan ətraflı söz açıb, təhsil işçilərinin qarşısında duran mühüm vəzifələri diqqətə çatdırıb.
Uğurlardan doğan yüksək əhval-ruhiyyə ilə keçən konfransda ali məktəblərə qəbul imtahanları zamanı 600-dən yuxarı bal toplayan 25 nəfər məzuna qiymətli hədiyyələr təqdim edilib.
Ötən il Prezident İlham Əliyevin Sərəncamı ilə keçirilən “Ən yaxşı müəllim” müsabiqəsinin qalibi diplomu Lənkəran şəhər 4 nömrəli məktəb-liseyin müəllimi Gülzar Əliyevaya və Vilvan kənd tam orta məktəbinin müəllimi İlhamə Rəhimovaya, “Ən yaxşı ümumtəhsil məktəbi” müsabiqəsinin qalibi diplomu isə şəhər 4 nömrəli məktəb-liseyin direktoru Yeganə Əsgərovaya təqdim olunub.
Konfrans iştirakçıları adından Prezident İlham Əliyevə müraciət qəbul edilib.