Lənkəranda idman paradı təşkil edilib
Lənkəran, 5 mart, İlkin Adıyev, AZƏRTAC
5 Mart – Bədən Tərbiyəsi və İdman Günü ölkənin müxtəlif bölgələrində olduğu kimi, Lənkəranda da təntənəli şəkildə qeyd edilib. Bu əlamətdar gün münasibətilə idman paradı təşkil olunub.
AZƏRTAC-ın bölgə müxbiri xəbər verir ki, tədbirə regionun idman ictimaiyyətinin nümayəndələri, veteran idmançılar, ümumtəhsil məktəblərinin fiziki tərbiyə müəllimləri və idmançı şagirdləri ilə yanaşı, şəhid ailələrinin üzvləri də qatılıblar.
Paradın əsas məqsədi gənclər arasında sağlam həyat tərzinin təbliği, idmana marağın artırılması və regionda idmanın inkişafına töhfə verməkdir. Tədbir çərçivəsində müxtəlif idman növləri üzrə peşəkar idmançıların nümunəvi çıxışları təşkil edilib. İştirakçılar boks, ağırlıqqaldırma, taekvondo, sərbəst və yunan-Roma güləşi, karate, şahmat, dama, cüdo, futbol, həndbol, atletika kimi idman növlərində öz bacarıqlarını nümayiş etdiriblər. Bununla yanaşı, kəndirlə mübarizə və müxtəlif mütəhərrik oyunlar təşkil olunub ki, bu da tədbirə daha da rəngarənglik qatıb.
Tədbirdə çıxış edən idman mütəxəssisləri və veteran idmançılar ölkəmizdə idmana göstərilən dövlət qayğısından, bu sahənin inkişafı üçün yaradılan şəraitdən bəhs ediblər. Onlar vurğulayıblar ki, Azərbaycanın idman sahəsində qazandığı uğurlar məhz ölkə rəhbərliyinin bu sahəyə verdiyi böyük dəstəyin nəticəsidir.
Kütləvi açıq idman tədbirində beynəlxalq və ölkə miqyaslı idman yarışlarında qalib olmuş idmançılar da iştirak ediblər. Onların iştirakı gənc idmançılar üçün böyük motivasiya olub. Qaliblər tədbir zamanı öz təcrübələrini bölüşərək, idmanda uğur qazanmağın əsas prinsipləri haqqında danışıblar.
Bölmənin digər xəbərləri
