Lerikdəki bulaqlar həm də şəfa mənbəyidir
Lerik, 13 avqust (AZƏRTAC). Talış dağlarının zirvəsində yerləşən Lerik rayonu füsunkar təbiəti və onun insanlara bəxş etdiyi gözəlliklərlə zəngindir.
AZƏRTAC xəbər verir ki, rayon mərkəzindən 50 kilometr məsafədə yerləşən Bülüdül kəndi ərazidə yerləşən bulaqları ilə tanınır. Kəndin eyni adlı Bülüdül bulağı isə yerli sakinlərlə yanaşı, buraya gələn qonaqların da təəccübünə səbəb olur. Sıldırım qayalıqlarla əhatə olunun bulağın mənbəyi bu günədək sirr olaraq qalır.
Kənd sakinlərinin sözlərinə görə, 16 il əvvəl bulağın bir gözü olub. 1998-ci ildə ərazidə baş verən zəlzələdən sonra qayanın digər hissəsində də su çeşmələri yaranıb.
Bütövlükdə 26 növ kimyəvi elementi olan bulağın suyu həm də şəfavericidir. Bulağın suyu insan orqanizmində bir sıra xəstəliklərin müalicəsində əvəzsiz rol oynayır. Böyrək, oynaq, bel, ayaq ağrılarından, ayaqlarda olan göbələk xəstəliyindən əziyyət çəkən insanlar bu müalicəvi sudan istifadə edərək sağlamlıqlarına qovuşublar.
Bülüdül bulağının suyundan süfrə suyu kimi də istifadə edilir. Gün ərzində minlərlə plastik qablar doldurularaq kəndin ərazisinə və qonşu kəndlərə aparılır.
Ümumiyyətlə, Lerik rayonunda 1000-ə yaxın bulaq vardır.
Bölmənin digər xəbərləri
