Livan tam elektriksiz qalıb
Bakı, 9 oktyabr, AZƏRTAC
Livan yanacaq çatışmazlığı ilə əlaqədar iki ən böyük elektrik stansiyasının işinin dayanması səbəbindən tam elektriksiz qalıb.
AZƏRTAC yerli LBCI telekanalına istinadla xəbər verir ki, dövlət elektrik kompaniyasının nümayəndəsi Birləşmiş Ərəb Əmirliklərindən mazut çatdırılmasının ləngiməsi nəticəsində şimaldakı Deyr-Ammar və cənubdakı Zahrani istilik elektrik stansiyalarının işinin dayandığını deyib. Elektrik təchizatında fasilələrin iki həftə davam edə biləcəyi bildirilir.
Mazut tədarükündə problemlər səbəbindən Livanın dövlət elektrik kompaniyaları yay mövsümündə əhalinin enerji ilə təminatını sutkada üç-dörd saatadək azaltmışdı, qalan vaxtlarda isə işıq özəl firmalara məxsus elektrik generatorları müəssisələrinə və vətəndaşların evlərinə verilirdi.
Adları yuxarıda çəkilən elektrik stansiyaları Livana lazım olan elektrik enerjisinin 60 faizini istehsal edir.
Bölmənin digər xəbərləri
