Bakı, 10 sentyabr (AZƏRTAC). Beynəlxalq Olimpiya Komitəsinin (BOK) Argentinada keçirilmiş 125-ci sessiyasında güləş idman növünü 2020 və 2024-cü il Yay Olimpiya Oyunlarının proqramında saxlanılması barədə verilən qərar çox sevindiricidir.

AZƏRTAC xəbər verir ki, bu sözləri sentyabrın 10-da Azərbaycan Güləş Federasiyasının mərkəzi ofisində güləş idman növünün 2020 və 2024-cü il Yay Olimpiya Oyunlarının proqramında saxlanılması ilə əlaqədar təşkil olunmuş mətbuat konfransında federasiyanın baş katibi, Olimpiya dərəcəli hakim Əjdər Cəfərov demişdir.

Argentinada keçirilmiş 125-ci sessiya ilə bağlı ətraflı məlumat verən natiq güləş idman növünün Yay Olimpiya Oyunlarının proqramında saxlanılmasına Azərbaycanın verdiyi töhfəni yüksək qiymətləndirmişdir. Vurğulamışdır ki, bütün dünyada olduğu kimi, Azərbaycanda da idmanın bu növünə böyük maraq vardır. BOK-un qədim tarixi ənənəyə malik bir idman növü olan güləşin Olimpiya Oyunlarının siyahısından çıxarılması barədə təşəbbüslə çıxış etməsi bütün dünyada, eləcə də Azərbaycanda təəccüblə qarşılanmışdı. İdmanın bu növünün Olimpiadanın proqramında saxlanılmasına dəstək məqsədilə Azərbaycan, Türkiyə, İran, Rusiya, ABŞ və digər ölkələrdə aksiyalar təşkil olunmuşdur.

BOK-un Beynəlxalq Güləş Federasiyasından gender bərabərliyinin qorunması məqsədi ilə Olimpiadada qadın güləşi üzrə çəki dərəcələrinin artırılmasını tələb etdiyini bildirən Ə.Cəfərov sentyabrın 16-17-də Macarıstanda bu məsələ ilə bağlı yekun qərarın qəbul olunacağını diqqətə çatdırmışdır. Qeyd etmişdir ki, sərbəst və yunan-Roma güləşi üzrə də çəki dərəcələrində dəyişikliyin olması gözlənilir. Ümid edirik ki, bu istiqamətdə köklü dəyişikliklər baş verməz. Milli komandamızın heyətində hər çəki dərəcəsi üzrə bir neçə güləşçinin olduğunu nəzərə alsaq bu dəyişikliyin yığmamıza mənfi təsir göstərəcəyini düşünmürəm. Son Olimpiya Oyunlarınadək sərbəst və yunan-Roma güləşi üzrə 7, qadın güləşi üzrə isə 4 çəki dərəcəsində qaliblər müəyyənləşirdi. BOK-un tələbinə əsasən, hər üç növ üzrə 6 çəki dərəcəsində qaliblər təyin olunmalıdır.

Ə.Cəfərov sentyabrın 16-dan 22-dək Macarıstanın paytaxtı Budapeştdə keçiriləcək dünya çempionatında ölkəmizi təmsil edəcək yığma komandaların heyətlərini də açıqlamışdır.

Baş məşqçi Cəmşid Xeyrabadinin rəhbərliyi altında yunan-Roma güləşi üzrə millimizin heyətində Orxan Əhmədov (55 kq), Kamran Məmmədov (60 kq), Həsən Əliyev (66 kq), Rafiq Hüseynov (74 kq), Saman Təhmasibi (84 kq), Şalva Qadabadze (96 kq) və Zaur Mehrəliyev (120 kq) yer almışlar.

Qadın güləşi üzrə yığmamızın baş məşqçisi Yaqub Məmmədov heyətə Anjela Doroqan (48 kq), Yuliya Ratkeviç (59 kq), İrina Netrebi (63 kq) və Gözəl Zutovanı (67 kq) daxil etmişdir.

Sərbəst güləş üzrə milli komandamızın böyük məşqçisi Firdovsi Umudovun rəhbərliyi altında Yaşar Əliyev (55 kq), Hacı Əliyev (60 kq), Ağahüseyn Mustafayev (66 kq), Cəbrayıl Həsənov (74 kq), Aleksandr Qostiyev (84 kq), Xetaq Qazyumov (96 kq) və Cəmaləddin Maqomedov (120 kq) birincilik uğrunda mübarizə aparacaqlar.