MAESTRO MSTİSLAV ROSTROPOVİÇİN ÇIXIŞI
Əziz dostlarım!
Salaməleyküm!
Demək istəyirəm ki, nədənsə, özümü Yer üzündə ən xoşbəxt adam sayıram. Əlbəttə, bəlkə də, bunu demək yaxşı düşmür, amma, zənnimcə, ona görə xoşbəxtəm ki, Bakıda doğulmuşam. Bilirsinizmi, Vətənimə, şəhərimə minnətdar olmaq istəyirəm və bu minnətdarlığın forması burada böyüyüb-başa çatacaq uşaqlar haqqında düşüncələr və onlara qayğıdır. Çünki mən özüm də burada doğulmuşam və şükürlər olsun ki, indiyədək inyeksiyasız yaşamışam.
Deməliyəm ki, proqramımız başlananda ona böyük dostum və böyük insan – indiki Prezidentin atası, Azərbaycan Prezidenti Heydər Əliyeviç Əliyev xeyir-dua verdi. İndicə gördüyüm fotoşəkillərdə o, burada, Bakıda iştirak etdiyimiz vaksinasiya zamanı təsvir olunmuşdur. Bu gün isə burada yeni Prezident, əziz, sevimli və gözəl dostum iştirak edir. Bütün bunlar proqramımıza xeyir-dua verir.
Onu da deməliyəm ki, mən Amerika Birləşmiş Ştatlarına çox minnətdaram. ABŞ səfiri Rino Harniş xanımı ilə birlikdə buradadır. Mən Sovet İttifaqından qovulanda 17 il ABŞ-da, Vaşinqtonda yaşadım, Milli Orkestrin baş dirijoru oldum. Bu ölkənin köməyi, bu ölkədən olan dostlarımın köməyi mənim üçün çox şey deməkdir. Bu kömək bütün dünyanı qəlbimdə xeyirxahlıqla birləşdirir.
Mən bütün həkimlərə təşəkkür etmək istəyirəm. Bilirəm ki, həyatınız çətindir. Amma deməliyəm ki, həyatımda ən yaxın dostlarım həkimlər olmuşlar, çünki biz eyni iş görürük – siz insanları cismən sağlam edirsiniz, biz isə onların qəlbini musiqi ilə müalicə edirik. Sizə təşəkkür etmək və səadət arzulamaq, demək istəyirəm, çox xoşbəxtəm ki, sizin belə gözəl səhiyyə naziriniz var. O da mənim gözəl dostumdur.
Çox sağ olun.
ABŞ-IN AZƏRBAYCANDAKI SƏFİRİ RİNO HARNİŞİN
ÇIXIŞI
- Hörmətli cənab Prezident!
Cənab Rostropoviç!
Cənab nazir İnsanov!
Hörmətli xanımlar və cənablar!
Mən Amerika xalqı adından bu mərasimdə, Azərbaycan uşaqları üçün nəzərdə tutulmuş proqramda iştirak etməkdən böyük fərəh hissi keçirirəm. Bizim hər üçümüzün arasında olan əməkdaşlığın nəticəsidir ki, Kənd Təsərrüfatı Departamentinin Azərbaycana gətirdiyi quru südün satışından əldə olunan gəlir cənab Rostropoviçin rəhbərlik etdiyi Fonda köçürülür. O da öz növbəsində, Azərbaycanda uşaqların peyvənd olunması prosesini təşkil edir.
Biz bunun birdəfəlik proqram olmasını istəmirik, ilbəil davam edən bir proqram olmasını istəyirik. Azərbaycanın Səhiyyə nazirliyi ilə yaxından əməkdaşlıq etmək istəyirik ki, bu proqram ilbəil davam etsin. Bu, həqiqətən də ABŞ-ın Azərbaycandakı səfiri kimi mənim fəaliyyətimin ən yaxşı, ən fərəhli hissəsidir ki, Azərbaycanda yeni məktəblərin, yeni uşaq klinikalarının açılışında iştirak edirəm. Biz Azərbaycan uşaqlarına bu yolla öz köməyimizi göstərmiş oluruq. Diqqətinizə görə çox sağ olun.
X X X
Prezidentin İcra Aparatının humanitar siyasət şöbəsinin müdiri Fatma Abdullazadə mərasimdə iştirak edirdi.
Bölmənin digər xəbərləri
