ELM VƏ TƏHSİL
Magistraturaya qəbul imtahanının ikinci mərhələsinin nəticələri açıqlanmışdır
Bakı, 27 may (AZƏRTAC). Tələbə Qəbulu üzrə Dövlət Komissiyası (TQDK) tərəfindən 2014/2015-ci tədris ili üçün Azərbaycan Respublikası ali təhsil müəssisələrinin magistraturalarına bu il mayın 25-də keçirilmiş qəbul imtahanının ikinci mərhələsinin nəticələri açıqlanmışdır.
Tələbə Qəbulu üzrə Dövlət Komissiyasından AZƏRTAC-a bildirmişlər ki, bakalavrlar ikinci mərhələdə onlara təqdim olunmuş test tapşırıqlarının (bəzi proqramlar üzrə isə yazılı imtahanın) nəticələri ilə bağlı məlumatı Komissiyanın rəsmi internet saytı vasitəsilə və ya mobil telefondan iş nömrəsini 7727 nömrəsinə SMS göndərməklə öyrənə bilərlər.
2014-cü ildə magistratura səviyyəsinə qəbul 59 proqram üzrə aparılır və 6 min 565 plan yeri ayrılmışdır.
İmtahanda iştirak etmək hüququ olan 10 min 160 bakalavrdan 350 nəfəri imtahana gəlməmişdir. İmtahan qaydalarını pozduğu üçün 1 nəfər imtahandan xaric olunmuş və nəticələri ləğv edilmişdir.
İmtahanda iştirak edən 9 min 809 bakalavrdan 7 min 504 nəfəri müsabiqə şərtini ödəyərək ixtisas seçiminə buraxılmışdır.
İki mərhələdə keçirilən imtahanın nəticələrinə əsasən maksimum nəticə 141 bal olmuşdur.
Müsabiqə şərtlərini ödəyən bakalavrlar mayın 29-dan iyunun 1-dək internet vasitəsilə ixtisaslaşma seçimini yerinə yetirməlidirlər.
Müsabiqəyə yalnız ixtisaslaşma seçimini edib təsdiqləyən bakalavrlar buraxılacaqlar.
Magistraturaya qəbul imtahanının ikinci mərhələsinin nəticələri ilə əlaqədar bakalavrların müraciətlərinə baxılması üçün TQDK-da mayın 29-da və 30-da Apelyasiya komissiyası fəaliyyət göstərəcəkdir. Bakalavrlar Apelyasiya komissiyasına şəxsiyyət vəsiqələrini təqdim etməklə şəxsən müraciət edə bilərlər.
Səhifənin qisa keçidi: http://www.tqdk.gov.az/~atR2Q