DÜNYA
Malayziyaya məxsus “Boeing 777-200” təyyarəsinin Hind okeanına düşdüyü yer hələ də dəqiqləşdirilməmişdir
Kuala-Lumpur, 25 mart (AZƏRTAC). Süni peyklərdən alınmış yeni məlumatlara baxmayaraq, Malayziya Hava Yollarına məxsus “Boeing 777-200” təyyarəsinin Hind okeanına düşdüyü yer hələ də dəqiqləşdirilməmişdir.
Malayziyanın nəqliyyat naziri vəzifəsini icra edən Hişamuddin Hüseyn bu barədə martın 25-də keçirdiyi mətbuat konfransında məlumat vermişdir.
H.Hüseyn demişdir: “Biz şimal dəhlizində və cənub dəhlizinin şimal hissəsində axtarışları dayandırmışıq. Bütün diqqət cənub dəhlizinə yönəldilmişdir. Hazırda əsas vəzifə axtarış zonasını daha da daraltmaqdan ibarətdir”.
Süni peyklərdən alınmış məlumat əsasında əvvəlcə iki axtarış zonası müəyyən edilmişdi. Şimal dəhlizi Qazaxıstanın və Türkmənistanın sərhədlərindən Tailandın şimalınadək, cənub dəhlizi isə İndoneziyadan Hind okeanının cənubunadək əraziləri əhatə edirdi. Martın 24-də elan edilmiş məlumatlara əsasən, təyyarənin Hind okeanının cənubuna, Avstraliyanın Pert şəhərindən şərqdə okeana düşdüyü bildirilmişdir.
H.Hüseyn bildirmişdir ki, hazırda axtarış zonasına Çinin altı gəmisi daxil olmuşdur. Bu gəmilərin MH370 reysinin düşdüyü ehtimal edilən əraziyə sabah səhər yaxınlaşacaqları gözlənilir. Axtarışlara “Syuelun” buzqıran gəmisi də cəlb edilmişdir.
Martın 25-də ölkə parlamentində çıxış edən H.Hüseyn bəyan etmişdir ki, okeana düşmüş təyyarənin “qara qutu”sunun axtarışları davam etdiriləcəkdir.
Xəbər verdiyimiz kimi, martın 8-də Kuala-Lumpurdan Pekinə uçan Malayziya Hava Yolları şirkətinə məxsus “Boeing 777-200” sərnişin təyyarəsi heç bir təhlükə siqnalı vermədən radarların ekranlarından yoxa çıxmışdır. Lakin sonradan süni peyklərdən alınmış məlumatların təhlili göstərmişdir ki, təyyarə kəskin dönüş edərək Hind okeanına istiqamət götürmüş və burada qəzaya uğrayaraq batmışdır. Təyyarənin göyərtəsində 227 sərnişin və 12 heyət üzvü olmuşdur.
Vüqar Ağayev
AZƏRTAC-ın xüsusi müxbiri
Kuala-Lumpur