İQTİSADİYYAT
Masallıda bu ilin doqquz ayında məhsul istehsalı və xidmətlərin həcmi 5,6 faiz artmışdır
Masallı, 20 oktyabr (AZƏRTAC). Masallı şəhərindəki Heydər Əliyev Mərkəzində 2013-cü ilin doqquz ayının sosial-iqtisadi yekunlarına həsr olunmuş hesabat yığıncağı keçirilmişdir.
AZƏRTAC xəbər verir ki, yığıncaqda 2013-cü ilin doqquz ayında Masallı rayonunda sosial-iqtisadi inkişaf sahəsində yüksək nəticələr qazanıldığı diqqətə çatdırılmışdır. Bildirilmişdir ki, hesabat dövründə rayon üzrə məhsul istehsalı və göstərilən xidmətlərin həcmi ötən ilin müvafiq dövrü ilə müqayisədə 5,6 faiz artmışdır.
Bu dövrdə sənaye məhsullarının həcmi 24 milyon 490 min manata, kənd təsərrüfatı məhsullarının həcmi isə 75 milyon 845 min manata çatmışdır. Əhaliyə göstərilən pullu xidmətlərin həcmi 3,7 faiz artaraq 48 milyon 960 min manat olmuşdur. Doqquz ay ərzində adambaşına düşən pul gəlirləri 1453 manat, bir işçiyə hesablanmış orta aylıq əmək haqqı 344,2 manat təşkil etmişdir.
Hesabat dövründə Bakı şəhərində kənd təsərrüfatı məhsullarının satışı yarmarkalarına 105,3 ton tərəvəz, 92,2 ton kartof, 3,2 ton ət, 6,1 ton balqabaq, 2,1 ton süd və süd məhsulları, 62 min ədəd yumurta göndərilmişdir.
Yığıncaqda qeyd olunmuşdur ki, 2013-cü ilin ötən dövründə rayon sahibkarlarına 42 layihə üzrə 2 milyon 28 min manat güzəştli kredit verilmişdir. Bunun nəticəsi olaraq rayonda 245 yeni iş yeri yaradılmışdır.
Ötən doqquz ayda sosial məsələlərin həllinə də diqqət artırılmış, bir sıra yeni obyektlər tikilmişdir. Ümumi uzunluğu 23,8 kilometr olan Həsənli-Xırmandalı, Kürdəbaz-Qarğalıq, Seybətin-Səmidxan, Musaküçə-Lürən, və Sərçuvar-Sirəbil kənd yolları istifadəyə verilmişdir. Qodman-Qəriblər yolunun çəkilişi yekunlaşmaq üzrədir.
Regionların sosial-iqtisadi inkişafına dair ikinci Dövlət Proqramında müəyyən edilmiş tədbirlərə müvafiq olaraq Eminli, Kürdəbaz, Qarğalıq və Şəhriyar kəndlərinə qaz çəkilmiş, Təklə kəndində və Ərkivan qəsəbəsində mövcud qaz xətləri təzələnmişdir. Hazırda Dəlləkli, Qədirli, Xallıcallı və Yeddioymaq kəndlərində qazlaşdırma işləri davam etdirilir, Kolatan və Bağıroba kəndlərində isə qaz xətlərinin çəkilişinə başlanılmışdır. Masallı şəhərinin içməli su və kanalizasiya sistemi yenidən qurulur.
Bildirilmişdir ki, Dövlət Proqramına əsasən və Heydər Əliyev Fondunun təşəbbüsü ilə “Yeniləşən Azərbaycana-yeni məktəb” devizi altında son illərdə Masallıda 33 yeni məktəb binası tikilmiş, 5 təhsil ocağı isə əsaslı təmir edilmişdir. Kosakül, Kəlbəhüseynli, Xıl, Öncəqala, Allahyarlı kəndlərində yeni məktəb binaları və Bədəlan kənd tam orta məktəbinin əsaslı təmir olunmuş bir korpusu şagirdlərin istifadəsinə verilmişdir. Hazırda isə Şatıroba, Çayqıraq, Dəlləkoba, Mahmudavar və Köhnə Zuvand kəndlərində yeni məktəb binalarının tikintisinə başlanılmışdır.
Hesabat dövründə Mahmudavar, Alışanlı kəndlərində yeni həkim məntəqələri tikilərək istifadəyə verilmişdir. Xırmandalı kəndində tibb məntəqəsinin tikintisi davam etdirilir. Yolağac, Miyankü, Güllütəpə, Şərəfə, Əhmədli, Hacıtəpə və Məmmədoba kəndlərində də tibb məntəqələrinin tikilməsi planlaşdırılır. Mərkəzi rayon xəstəxanasında, Boradigah qəsəbə və Kalinovka kənd sahə xəstəxanalarında əsaslı təmir işlərinə başlanılmışdır.
Toplantıda çıxış edənlər rayonun sosial-iqtisadi inkişafı istiqamətində qazanılmış uğurlardan danışmış, mövcud problemlərlə bağlı təkliflərini bildirmişlər.