MAYK TAYSON BRAZİLİYADA DA DİNC DURMADI

12.11.2005 [02:48]
Çap et
A⁺ A^-

AZƏRTAC İTAR-TASS-a istinadla xəbər verir ki, ağır çəkidə boks üzrə keçmiş dünya çempionu Mayk Tayson bu günlərdə Braziliyanın San-Paulu şəhərində jurnalistə əl qaldırdığına görə polis tərəfindən saxlanılmışdır. Tayson onun gecə klubunda necə istirahət etdiyini çəkən yerli SBN telekanalının jurnalisti Karlos Mellunu döymüşdür.

Mellu demişdir ki, sabiq boksçu onun kamerasını əlindən alıb, başına çırpmışdır. Bundan sonra Tayson başqa gecə klubuna getmişdir. “Dəmir Mayk”ı polis elə burada yaxalamışdır. Mayk bu dəfə özünü dinc apararaq, asayiş keşikçilərinə müqavimət göstərməmişdir. Amerikalını yaxınlıqdakı polis şöbəsinə aparmış, burada ona iş açdıqdan sonra buraxmışlar. O, jurnalistə xəsarət yetirməkdə və maddi ziyan vurmaqda təqsirləndirilir.

Onun işinə tezliklə San-Paulu məhkəməsində baxılacaqdır. Tayson barəsində ictimai işlərdə işləmək və ya cərimə ödəmək haqqında hökm çıxarıla bilər.