MƏLİK MƏLİK OĞLU MƏHƏRRƏMOV
Məlik Məhərrəmov 1920-ci il avqustun 29-da Zərdab rayonunun Bıçaqçı kəndində anadan olmuşdur. O, 1936-cı ildə orada natamam orta təhsilini başa vuraraq, Bakıda Xalq Təsərrüfatı Texnikumunda oxumuş, 1939-cu ildə texnikumu bitirdikdən sonra isə keçmiş sovet ordusu sıralarına çağırılmışdır. O, 1942-ci ildə Rusiyanın Vladimir şəhərində hərbi məktəbi bitirmişdir. Məlik Məhərrəmov 1941-1945-ci illər müharibəsində Berlinədək şərəfli döyüş yolu keçmiş, Belorusiya, Ukrayna uğrundakı döyüşlərdə xüsusilə fərqlənmişdir. Onun komandir olduğu rota 1943-cü ilin payızında Dneprin keçilməsində böyük məharət göstərmişdir. Həmin döyüş əməliyyatına görə Məlik Məhərrəmova və onun rotasından 17 nəfərə Sovet İttifaqı Qəhrəmanı adı verilmişdir.
Məlik Məhərrəmov müharibədən sonra atıcı diviziyada batalyon komandiri olmuşdur. O, 1954-cü ildə Frunze adına Hərbi Akademiyanı bitirmiş, polk qərargah rəisi vəzifəsində işləmişdir.
Məlik Məhərrəmov 1966-cı ilə qədər Azərbaycan Respublikasının Hərbi Komissarlıq sistemində məsul vəzifələrdə çalışmış, Xızı, Ağdaş, Sabirabad, Kürdəmir rayonlarında və Bakı şəhərinin Nərimanov rayonunda hərbi komissar olmuşdur. 1966-73-cü illərdə isə Azərbaycan Dövlət Universitetində hərbi kafedranın rəisi olmuşdur. O, 1973-cü ildə ehtiyata çıxsa da, universitetdə fəaliyyətini davam etdirmiş, əvvəl kadrlar şöbəsinin, sonra isə ömrünün sonuna qədər Birinci şöbənin rəisi vəzifəsində çalışmışdır.
Məlik Məhərrəmov 1941-1945-ci illər müharibəsində göstərdiyi hərbi məharətə, komandirlik bacarığına və igidliyinə görə o dövrdə ən yüksək qəhrəmanlıq adına - Sovet İttifaqı Qəhrəmanı adına layiq görülmüş, SSRİ-nin bir sıra orden və medalları ilə təltif edilmişdir. 1995-ci ildə Məlik Məhərrəmovun yubileyi təntənəli surətdə qeyd edilmiş, o, müstəqil respublikamızın “Şöhrət” ordeni ilə təltif olunmuşdur.
Məlik Məhərrəmov İkinci Dünya müharibəsinin ilk illərindən amansız döyüşlərdə iştirak etmiş, cəsurluğu və təşkilatçılığı ilə fərqlənmiş qəhrəman Azərbaycan oğullarından idi. O, XX əsrdə bəşəriyyətin üzləşdiyi dəhşətli faşizm təhlükəsinə qarşı mübarizədə xalqımızın hərb tarixinə şanlı səhifələr yazmış qəhrəman insanlar nəslinə mənsubdur.
Məlik Məhərrəmov ömrünün son çağlarına kimi ölkəmizdə hərbi vətənpərvərliyin təbliği sahəsində çalışmış, gənclərin orduya hazırlanmasında, silahlı qüvvələrin şəxsi heyətinin mənəvi-psixoloji hazırlığının, döyüş qabiliyyətinin yüksəldilməsində səylərini əsirgəməmişdir. Ölkəmizin müxtəlif bölgələrində ön xətdə hərbçilərlə keçirdiyi görüşlər gənc döyüşçülərin yaddaşına həmişəlik həkk olunmuşdur.
Məlik Məhərrəmovun Vətənə məhəbbət, xalqa xidmət, əsl qəhrəmanlıq nümunəsi olan şərəfli ömür yolu gənc nəslin hərbi vətənpərvərlik ruhunda tərbiyəsi üçün bir məktəbdir.
Azərbaycan xalqı öz qəhrəman oğlu Məlik Məhərrəmovun xatirəsini həmişə əziz tutacaqdır.
Allah rəhmət eləsin!
İlham Əliyev, Murtuz Ələsgərov,
Artur Rasizadə, Ramiz Mehdiyev,
Səfər Əbiyev, Hacıbala Abutalıbov,
Vahid Əliyev, Fatma Abdullazadə,
Misir Mərdanov, Nizami Xudiyev,
Abel Məhərrəmov, Baloğlan Rüstəmov,
Tofiq İmanov
X X X
Mərhumun cənazəsi vidalaşmaq üçün 2004-cü il iyulun 17-də saat 13.00-dan 16.00-a kimi Azərbaycan Respublikası Müdafiə Nazirliyinin Həzi Aslanov adına Mərkəzi Zabitlər Evində qoyulacaqdır (Səməd Vurğun küçəsi, 12).
Bölmənin digər xəbərləri
