İQTİSADİYYAT
Mərkəzi Bank ilə "Visa İnc." arasında əməkdaşlıq əlaqələrinin inkişaf perspektivləri müzakirə olunub
Bakı, 26 oktyabr, AZƏRTAC
Oktyabrın 26-da Mərkəzi Bankda ölkədə nağdsız ödənişlərin genişləndirilməsi istiqamətində görülən işlərin davamı olaraq "Visa İnc." beynəlxalq kart təşkilatının nümayəndələri ilə keçirilən görüşdə hər iki qurum arasında formalaşmış əməkdaşlıq əlaqələri və bu əlaqələrin gələcək inkişaf perspektivləri müzakirə olunub.
Mərkəzi Bankdan AZƏRTAC-a bildiriblər ki, "Visa İnc." beynəlxalq kart təşkilatını Azərbaycan, Moldova və Belarus üzrə regional meneceri İqor Kovalyov, MDB və Cənub-Şərqi Avropa regionu üzrə dövlət qurumları ilə əlaqələr sektorunun direktoru Yuliya Zavalişnaya və rəqəmsal həllər sahəsində direktoru Andrey Şerbina təmsil edib.
Mərkəzi Bankın sədrinin birinci müavini Alim Quliyev ölkədə nağdsız ödənişlərin genişləndirilməsinin hər zaman hökumətin, o cümlədən Mərkəzi Bankın diqqət mərkəzində olduğunu vurğulayıb və məsələnin bu gün də aktual olduğunu deyib. Azərbaycan Respublikası Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında telekommunikasiya və informasiya texnologiyalarının inkişafına dair Strateji Yol Xəritəsi" barədə görüş iştirakçılarına məlumat verən A.Quliyev ölkə Prezidentinin "Rəqəmsal ödənişlərin genişləndirilməsi" istiqamətində konkret tapşırıqlar verdiyini və bu istiqamətdə əlaqədar hökumət qurumları və beynəlxalq təşkilatlarla birgə əməkdaşlığın zəruriliyini vurğulayıb. Belə ki, məhz bu birgə əməkdaşlıq çərçivəsində "2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı"nın layihəsi hazırlanıb.
"Visa İnc." beynəlxalq kart təşkilatının nümayəndələri görüşdə Bakı şəhəri də daxil olmaqla dünyanın 100 iri şəhərində istehlakçılar, biznes qurumları və hökumət üçün rəqəmsal ödənişlərin iqtisadi üstünlükləri və yaratdığı əlavə dəyərlər barədə aparılmış geniş diaqnostika və təhlillər haqqında danışıb.
Eyni zamanda, mobil ödənişlərdə, rəqəmsal bankçılıqda, elektron ticarətdə hesablaşmalarda yüksək təhlükəsizliyi və rahatlığı təmin edəcək "Visa İnc." beynəlxalq kart təşkilatı tərəfindən hazırlanmış müasir və innovativ Visa Tokenizasiya Xidməti barədə ətraflı məlumat verilib, bu xidmətin üstünlükləri diqqətə çatdırılıb.