MƏŞHUR PİANOÇU BAKIDA ÇIXIŞ EDƏCƏK
Filarmoniyadan AZƏRTAC-ın müxbirinə bildirmişlər ki, istedadlı pianoçu Üzeyir Hacıbəyov adına Azərbaycan Dövlət Simfonik Orkestri ilə çıxış edəcəkdir.
Tanınmış pianoçu A.Volodin fitri istedada, yüksək texnikaya yiyələnmiş ifaçı kimi artıq özünü təsdiq etmişdir. Rusiyada sənətkarlığı yüksək qiymətləndirilmiş pianoçu özünəməxsus ifa tərzinə malikdir. 26 yaşlı ifaçı Sidney (Avstraliya) və Santanderdə (İspaniya) keçirilmiş pianoçuların Beynəlxalq müsabiqələrində Qızıl medal və “Qran-Pri” mükafatına layiq görülmüş,”Ennio Porrino” (İtaliya) və “Geza Anda” (İsveçrə) kimi nüfuzlu müsabiqələrin iştirakçısı olmuşdur.
Volodin 2002-ci ildən Moskva Dövlət Akademik Filarmoniyasının solisti kimi fəaliyyət göstərir. Eyni zamanda, o, Moskva Dövlət Konservatoriyasında dünya miqyaslı pianoçu, professor E.Virsaladzenin assistenti kimi çalışır. Volodin dünyanın nüfuzlu musiqi festivallarında iştirak etmiş, ABC Classics Avstraliya şirkətində bir neçə kompakt-diski buraxılmışdır.
Bakıda nəzərdə tutulan konsertdə məşhur pianoçu P.Çaykovskinin 1 saylı, S.Raxmaninovun 3 saylı konsertlərini ifa edəcəkdir.
Bölmənin digər xəbərləri
