MƏŞHUR PİANOÇU BAKIDA ÇIXIŞ EDƏCƏK

20.09.2004 [13:59]
Çap et
A⁺ A^-

Müslüm Maqomayev adına Azərbaycan Dövlət Filarmoniyasında sentyabrın 24-də məşhur pianoçu Aleksey Volodinin konserti olacaq.

Filarmoniyadan AZƏRTAC-ın müxbirinə bildirmişlər ki, A.Volodin Üzeyir Hacıbəyov adına Azərbaycan Dövlət Simfonik Orkestri ilə çıxış edəcəkdir.

Tanınmış ifaçı pianoçuların Sidney (Avstraliya) və Santanderdə (İspaniya) keçirilmiş Beynəlxalq müsabiqələrində Qızıl medal və “Qran-Pri” mükafatına layiq görülmüş, “Ennio Porrino” (İtaliya) və “Geza Anda” (İsveçrə) kimi nüfuzlu müsabiqələrin iştirakçısı olmuşdur.

Pianoçu 2002-ci ildən Moskva Dövlət Akademik Filarmoniyasının solisti kimi fəaliyyət göstərir. Eyni zamanda, o, Moskva Dövlət Konservatoriyasında dünya miqyaslı pianoçu, professor E.Virsaladzenin assistenti kimi çalışır.

Bakıda verəcəyi konsertdə məşhur pianoçu P.Çaykovskinin 1 nömrəli, S.Raxmaninovun 3 nömrəli konsertlərini ifa edəcəkdir.