Azərbaycan Respublikası və İran İslam Respublikası arasında sıx və səmimi əlaqələrin təzahürü olaraq, İran İslam Respublikasının Prezidenti Bakıda hərarətlə qarşılandı. Tərəflər səmimiyyət və dostluq şəraitində keçirilən danışıqlar zamanı aşağıdakılar barədə müzakirələr apardılar:

I

Tərəflər dostluq münasibətlərini möhkəmləndirmək məqsədi ilə siyasi əlaqələri və qarşılıqlı fəaliyyəti daha da inkişaf etdirəcəklər.

Tərəflər ikitərəfli əlaqələrin bütün səviyyələrdə dərinləşdirilməsinə, o cümlədən iki ölkənin icra, qanunverici və məhkəmə hakimiyyətləri arasında əməkdaşlığın inkişaf etdirilməsinə razılıqlarını bildirərək, ölkələrimizin rəsmi şəxslərinin qarşılıqlı səfərlərinin həyata keçirilməsini vurğulamışlar.

Tərəflər İran İslam Respublikasının Təbriz şəhərində Azərbaycan Respublikasının baş konsulluğunun yaxın günlərdə fəaliyyətə başlaması barədə razılığa gəlmişlər.

Tərəflər məmnunluqla qeyd edirlər ki, mövcud müqavilə-hüquq bazası Tərəflər arasındakı münasibətlərin hərtərəfli inkişafının təmin edilməsi üçün etibarlı əsasdır.

Tərəflər terrorizm və onun bütün təzahürləri ilə, narkotik vasitələrin, psixotrop maddələrin, onların analoqlarının və prekursorlarının qanunsuz dövriyyəsi, transmilli mütəşəkkil cinayətkarlıq, insan alveri və qaçaqmalçılıqla mübarizə sahələrində qarşılıqlı fəaliyyət məqsədi ilə ikitərəfli və çoxtərəfli əməkdaşlığın səmərəliliyini artıracaqlar.

Tərəflər təşkilatların, qrupların və ayrı-ayrı şəxslərin bir-birinin dövlət suverenliyinə, müstəqilliyinə və ərazi bütövlüyünə qarşı yönəldilmiş fəaliyyətinin öz ərazilərində qadağan edilməsi və aradan qaldırılması üzrə lazımi səylər göstərəcək və tədbirlər görəcəklər.

Tərəflər BMT Nizamnaməsinə uyğun olaraq, dövlətlərin suverenliyinə və ərazi bütövlüyünə, onların sərhədlərinin toxunulmazlığına hörmət əsasında münaqişələrin sülh yolu ilə həll edilməsi məqsədi ilə fəaliyyət göstərəcəklər.

İran İslam Respublikası Ermənistan–Azərbaycan, Dağlıq Qarabağ münaqişəsinin həlli məsələsində Azərbaycan Respublikasının ərazi bütövlüyünü dəstəkləyir, qaçqınların və məcburi köçkünlərin öz torpaqlarına qayıtmasının zəruriliyini qeyd edir.

Azərbaycan Respublikası İran İslam Respublikasının ötən illər ərzində qaçqın və məcburi köçkünlərə göstərdiyi humanitar yardıma görə təşəkkürünü bildirmişdir və hər iki tərəf bunun davam etdirilməsini zəruri hesab etmişdir.

Tərəflər milli təhlükəsizliyin təmin olunması məsələlərində əməkdaşlığın əhəmiyyətini qeyd etməklə, ayrı-ayrı sazişlər əsasında hər iki dövlətin müvafiq qurumları arasında əməli əməkdaşlığın davam etdirilməsinə yardım edəcəklər.

II

Tərəflər hər iki dövlətin potensialı əsasında ticarət-iqtisadi və elmi-texniki əməkdaşlığın səviyyəsini artırmaq üçün lazımi tədbirlər görəcəklər.

Tərəflər 2002-ci il oktyabr ayının 30-da Bakı şəhərində imzalanmış “Azərbaycan Respublikası və İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlətlərarası Müştərək Komissiyanın 5-ci iclasının nəticələri barədə Memorandum”un həyata keçirilməsi üçün tədbirlər görməyə razılaşaraq, həmin anlaşmaların və Dövlətlərarası Müştərək Komissiyanın gələcək iclaslarının mütəmadi şəkildə, xüsusilə də 6-cı Tehran iclasının tezliklə keçirilməsinin vacibliyini qeyd etmişlər.

Tərəflər müxtəlif ticari və iqtisadi sahələrdə, ilk növbədə, neft və neft sənayesi, neft kimyası məhsulları, kimya və yüngül sənaye, maşınqayırma, aqrar-sənaye kompleksləri, nəqliyyat, nəqliyyat infrastrukturları və rabitə sahələrində əməkdaşlığın genişləndirilməsinə səy göstərəcəklər.

Tərəflər maliyyə və bank strukturlarının qarşılıqlı fəaliyyəti, birgə sərmayə layihələrinin gerçəkləşməsi, birgə müəssisələrin və digər təsərrüfat strukturlarının formalaşmasında əməkdaşlığı qeyd etmişlər.

Azərbaycan Respublikası İran İslam Respublikasının Avropa-Qafqaz-Asiya beynəlxalq nəqliyyat dəhlizinə (TRASECA) qoşulmaq niyyətini bir daha dəstəklədiyini bildirir. Eləcə də, İran İslam Respublikası Azərbaycan Respublikasına Şimal-Cənub nəqliyyat dəhlizinə aid Sazişə qoşulması ilə əlaqədar dəstəyini bir daha təsdiq edir.

Tərəflər nəqliyyat sahəsində əməkdaşlığı vurğulamaqla, Astara-Bakı avtomobil yolunun, sərhəd körpülərinin tikintisi və sərhədyanı ticarət sahəsində əməkdaşlığa dair əldə olunmuş razılaşmaları alqışlayır, bu münasibətlərin genişləndirilməsinə və həyata keçirilməsinə xidmət edən lazımi strukturların yaradılması məqsədi ilə birgə tədbirləri dəstəkləyir və Qəzvin-Rəşt-Ənzəli-Astara-Astara dəmir yolu xəttinin layihələndirilməsi, tikintisi və istifadəyə verilməsi məqsədi ilə İran İslam Respublikası-Azərbaycan Respublikası-Rusiya Federasiyası üçtərəfli konsorsiumunun yaradılmasını bəyan etmişlər.

Tərəflər elektrik stansiyalarının tikintisi və yardımçı stansiyaların quraşdırılması və istismarı sahəsində ikitərəfli və çoxtərəfli qaydada əməkdaşlığa dair qarşılıqlı anlaşmalardan məmnun olduqlarını bildirərək, bu razılaşmaların həyata keçirilməsinin əhəmiyyətini qeyd etmişlər.

Tərəflər Ordubad və Məzrəə su bəndləri tikintisinin və Xoy-Culfa qaz kəməri çəkilməsinin xüsusi əhəmiyyətini qeyd etmişlər.

Azərbaycan Respublikası Naxçıvan Muxtar Respublikasına İran İslam Respublikasının göstərdiyi humanitar yardımlara görə minnətdarlığını bildirərək, bu yardımların davam etdirilməsinin zəruriliyini vurğulamışdır və İran İslam Respublikası yardımı davam etdirəcəyini təsdiqləmişdir. Tərəflər Naxçıvan Muxtar Respublikasında müxtəlif inkişaf layihələrinin, o cümlədən yol tikintisi, energetika, təbii qaz, kənd təsərrüfatı və sənayenin inkişafı, səhiyyə sahəsində əməkdaşlığa dair layihələrin və bu sahələrdə əldə olunmuş razılaşmaların həyata keçirilməsinin zəruriliyini vurğulamış və qarşılıqlı əməkdaşlığın genişləndirilməsini təsdiq etmişlər.

III

Tərəflər Azərbaycan Respublikası və İran İslam Respublikası arasında humanitar sahədə əlaqələrin və əməkdaşlığın inkişaf etdirilməsinin, hər iki xalqın tarixi, mədəni və dini ortaqlıqlarını nəzərə almaqla, möhkəm və obyektiv əsasa malik olduğunu qeyd etmişlər.

Tərəflər mədəniyyət, elm, təhsil, səhiyyə və sosial təminat sahələrində qarşılıqlı fəaliyyət üçün səylərini artıracaqlarını qeyd etmişlər.

Tərəflər iki ölkənin dostluq münasibətləri çərçivəsində mədəniyyət, incəsənət, KİV vasitələri, elm, təhsil, səhiyyə, sosial təminat mütəxəssislərinin hazırlanması və ixtisaslarının artırılması sahələrində əməkdaşlığın daha da dərinləşdirilməsi istiqamətində səylərinin gücləndiriləcəyini qeyd etmişlər.

IV

Tərəflər Xəzər dənizinin hüquqi statusuna dair məsələləri dostluq və səmimiyyət şəraitində hərtərəfli müzakirə etmiş və Xəzər dənizinin hüquqi statusu haqqında Konvensiyanın Xəzəryanı beş ölkənin razılaşması əsasında həll edilməsi üzrə danışıqları dəstəkləmişlər. Onlar danışıqların davam etdirilməsi barədə razılığa gəlmişlər.

V

Tərəflər dövlətlərin suveren bərabərliyi, ərazi bütövlüyü, bir-birinin daxili işlərinə qarışmamaq prinsiplərinə əsaslanaraq, beynəlxalq hüququn hamılıqla tanınmış normalarını nəzərə alaraq, ikitərəfli və çoxtərəfli əsasda sıx siyasi və iqtisadi əlaqələri gücləndirəcəklər.

Tərəflər qarşılıqlı maraq doğuran məsələlər üzrə işbirliyi çərçivəsində BMT və onun təsisatları, İKT, İƏT və digər regional və beynəlxalq təşkilatlar formatında əməkdaşlığı inkişaf etdirməyə hazır olduqlarını təsdiq etmişlər.