Bakı, 19 fevral, AZƏRTAC

Aqrar Sığorta Fondu və Ucar Rayon İcra Hakimiyyətinin təşkilatçılığı ilə fermerlərlə görüş keçirilib, aqrar sığorta mexanizmi, onun üstünlükləri və fermerlər üçün əhəmiyyəti barədə geniş məlumat verilib.

AZƏRTAC xəbər verir ki, Ucar Rayon İcra Hakimiyyəti başçısının müavini Vaqif Mehdiyev Ucarda çoxsaylı meyvə bağlarının olduğunu bildirib. Qeyd edib ki, rayonun 31 min hektardan artıq əkin ərazisinin 14 min hektarı taxıl bitkiləri, 17 min hektarı isə digər bitkilərin payına düşür.

Görüşdə diqqətə çatdırılıb ki, aqrar sığorta vasitəsilə əkin sahələri, taxıl zəmiləri, tərəvəz və bostan bitkiləri, eləcə də meyvə bağları olmaqla, ümumilikdə, 48 məhsul sığortalanır. Ucar rayonunun yerləşdiyi Mərkəzi Aran regionu ölkədə ən aşağı sığorta tarifi olan bölgələrdəndir. Eyni zamanda, fermerlərə dəstək məqsədilə sığorta haqqının 50 faizini dövlət özü ödəyir. Nəticədə bu bölgədə min manatlıq məhsulu olan buğda sahəsinin sığortası cəmi 7,4 manata, arpa sahəsinin sığortası 9 manata başa gəlir.

Tədbirdə təsərrüfat sahiblərinə, xüsusilə meyvə bağlarının və kənd təsərrüfatı heyvanlarının sığortası ətraflı izah edilib. Bildirilib ki, min manatlıq nar məhsulunun baza zərfi ilə çoxsaylı risklərdən sığortası 16 manata, xurma məhsulunun sığortası isə 22 manata başa gəlir. Bu rəqəm heyva məhsulunda 26 manat, alça bağları üçün isə 34 manat təşkil edir. Həmçinin fermerlərə yonca əkinlərinin sığorta şərtləri və baş verən hadisələrə görə, sığorta ödənişi qaydaları izah olunub. Aqrar sığorta mexanizmi meyvə bağlarını müxtəlif risklərdən - dolu, sel-subasma, fırtına, qasırğa, normadan artıq yağıntı, yanğın, üçüncü şəxslərin hərəkətlərindən sığortalayır. Bundan başqa, əlavə ödənişlə, şaxtavurma (donvurma), dolu nəticəsində keyfiyyət itkisi kimi risklərdən də sığortalanmaq olar.

Tədbirdə, eyni zamanda vurğulanıb ki, aqrar sığorta vasitəsilə iribuynuzlu və xırdabuynuzlu mal-qaranı da sığortalamaq mümkündür. Əkin sahələrində olduğu kimi, heyvandarlıq sığortasında da sığorta haqqının 50 faizini fermerlərə dəstək üçün dövlət ödəyir.

Bir qədər əvvəl Aqrar Sığorta Fondunun idarə heyətinin qərarı ilə heyvandarlıq sığortası üzrə tariflər azaldılaraq 5,2-8,2 faizə endirilib. Nəticədə hazırda min manatlıq iribuynuzlu heyvanın sığortalanması fermerlərə cəmi 26 manata, 300 manatlıq xırdabuynuzlu heyvanın sığortası isə cəmi 7 manata başa gəlir.

Fermerlər aqrar sığortadan faydalanmağa başlayıblar. 2023-cü ildə Aqrar Sığorta Fondu tərəfindən əkin sahələrinə, bağçılıq və heyvandarlıq təsərrüfatlarına dəyən zərər üzrə fermerlərə ümumilikdə 4,4 milyon manat sığorta ödənişi həyata keçirilib. Bu, 2022-ci illə müqayisədə 80 faiz çoxdur.

İcra hakimiyyətinin rəhbərliyi və Aqrar Sığorta Fondunun nümayəndələri fermerləri dövlətin bu sahədəki dəstəyindən faydalanmağa və təsərrüfatlarını sərfəli şərtlərlə sığorta etməyə dəvət ediblər.

Görüşdə fermerlə meyvə bağlarının, heyvanların və yonca bitkisinin sığortalanması üzrə çoxsaylı suallar verilib və hamısı ətraflı cavablandırılıb.

Aqrar sığortanın əhatə etdiyi məhsullar və risklər, eləcə də sığorta haqları barədə ətraflı məlumatı Aqrar Sığorta Fondunun www.asf.gov.az rəsmi internet səhifəsindən və səhifədəki “Bitkiçilik sığortası kalkulyatoru” vasitəsilə əldə etmək mümkündür.

Fermerlər, həmçinin Fondun “1651” Çağrı mərkəzinə zəng etməklə, aqrar sığorta barədə məlumat ala, təsərrüfatlarını sığortalaya bilərlər.