REGİONLAR
“Microsoft” korporasiyası tərəfindən Naxçıvanda keçirilən vebinarlar davam edir
Naxçıvan, 22 fevral, AZƏRTAC
Naxçıvan Muxtar Respublikası Rabitə və Yeni Texnologiyalar Nazirliyinin təşkilatçılığı ilə “Microsoft” korporasiyasının Azərbaycan nümayəndəliyi tərəfindən Naxçıvan Dövlət Texniki Kollecində tələbələrə “Robotic Process Automation - tez-tez təkrar olunan işlərin tam və ya qismən avtomatlaşdırılması”, “Hibrid həllərin tətbiqi”, “Süni intellektin sənayedə tətbiqi” mövzularında vebinar keçirilib.
AZƏRTAC-ın Naxçıvan bürosu xəbər verir ki, əvvəlcə Naxçıvan Muxtar Respublikasının təhsil naziri Rəhman Məmmədov çıxış edərək, tədbirin əhəmiyyətindən söz açıb. Diqqətə çatdırıb ki, informasiya texnologiyalarının cəmiyyətin bütün sahələrində özünəməxsus fəaliyyət mexanizmi formalaşdırılıb və təhsildə tətbiq olunan yeniliklər durmadan artır. Hazırda informasiya cəmiyyətinə istiqamətlənmiş yol bəşəriyyətin gələcəyinə gedən yol kimi dəyərləndirilir. Qlobal miqyasda gedən proseslər, informasiyalı cəmiyyətin gətirdiyi yeniliklər bunu deməyə əsas verir. Bu mənada informasiya texnologiyalarının təhsilə tətbiqi təhsil müəssisələrinin tədris prosesinin modeli nəzərə alınmaqla həyata keçirildikdə, daha çox səmərə əldə etmək mümkündür.
Vurğulanıb ki, muxtar respublikada aparılan quruculuq işləri sırasında təhsil quruculuğu özünəməxsus yer tutur. Qədim diyarda yeni-yeni məktəb binaları inşa olunur və ya yenidən qurularaq istifadəyə verilir. Həmin məktəblərin maddi-texniki təminatı da ən yüksək səviyyədə həyata keçirilir. Bunun nəticəsidir ki, bu gün təhsil müəssisələrində sürətli internetə çıxışı olan 5700-dən artıq kompüter və 650-dən çox elektron lövhə var. Muxtar respublikanın Təhsil Nazirliyinin tabeliyində Distant Təhsil Mərkəzi, həmçinin 53 təhsil müəssisəsində STEAM kabinəsi yaradılıb.
Muxtar respublikanın rabitə və yeni texnologiyalar naziri Vüsal Sevdimaliyev rabitə və yeni texnologiyalar sahəsinə göstərilən dövlət qayğısından danışaraq bildirib ki, muxtar respublikada sosial-iqtisadi həyatın bütün sahələrində yeni texnologiyalar geniş tətbiq olunur, bu sahənin maddi-texniki bazasının gücləndirilməsi, əhalinin informasiya-kommunikasiya texnologiyalarına çıxış imkanlarının yaxşılaşdırılması, mobil rabitə xidmətinin əhatə dairəsinin genişləndirilməsi diqqətdə saxlanılır.
Vebinarda “Microsoft” korporasiyasının Azərbaycan nümayəndəliyinin rəhbəri, Amerika Ticarət Palatasının Rəqəmsal Texnologiyalar və İnnovasiyalar komitəsinin sədri, Azərbaycan Sahibkarlar Konfederasiyasının İnnovasiyalar və Rəqəmsal Həllər komissiyasının üzvü Qaçay Mirzəyev dünyanın ən qabaqcıl texnologiyalarının tətbiqindən bəhs edib.
Təlimdə kompüterdə və digər sistemlərdə tez-tez təkrar olunan tapşırıqların 60 faizini avtomatlaşdırmaq və bunun zamana qənaət etmək, daha səmərəli işləmək imkanı olması kimi üstünlükləri diqqətə çatdırılıb.
Vurğulanıb ki, “Microsoft” korporasiyasının əksər həllərini hibrid rejimdə istifadə etmək mümkündür. Bu zaman cari infrastruktura yatırılmış sərmayələri daha səmərəli istifadə etməklə müasir bulud həllərinin təqdim etdiyi üstünlüklərdən də faydalanmaq olar.
Təlimçi süni intellekt haqqında məlumat verərək diqqətə çatdırıb ki, hazırda bu sistem dünyanın bir çox ölkəsində, müxtəlif sahələrdə və müxtəlif problemlərin həlli üçün tətbiq olunur. Tibbi diaqnozların qoyulmasından başlayaraq robotların idarəsi, trade platformaları, insan resurslarının idarə olunması, özünü idarə edən maşınlar və insan təhlükəsizliyi kimi sahələrdə süni intellektin tətbiqinə rast gəlmək olar. Cüzi və ya insan faktoru olmadan süni intellekt sistemləri və proseslərin qərar qəbul edilməsinin avtomatlaşdırılması bir çox sahələrdə tətbiq olunur.
Bildirilib ki, süni intellekt dayanmadan inkişaf edən sahələrdəndir və növbəti onillikdə bu texnologiya dünyanı, iqtisadiyyatı, bir sözlə, bütün xidmətləri və peşələri dəyişə bilər. Bu yeniliyin gətirdiyi mənfi və müsbət tərəfləri araşdırmaq, asanlaşdırmaq və idarə etmək isə hazırda cəmiyyətin ən vacib mövzularından biri olaraq qalır.
Təlimin sonunda iştirakçıları maraqlandıran suallar cavablandırılıb.