“MİCROSOFT” ÖZÜNÜN PULLU ENSİKLOPEDİYASINI BAĞLAYIR
Bakı, 2 aprel (AZƏRTAC). Xarici KİV-lərin məlumatına görə, “Microsoft” şirkəti özünün “Encarta” onlayn ensiklopediyasının fəaliyyətini dayandırmaq qərarına gəlmişdir. Bu resursun son dil versiyası cari ilin dekabr ayında bağlanacaqdır.
Şirkət “Encarta”nın, yapon dili istisna olmaqla, bütün dillərdə versiyalarını oktyabrın 31-də bağlamağı planlaşdırır. Yapon dilində olan versiyanın fəaliyyəti isə ilin sonunda dayandırılacaqdır. Bu addımın əsas səbəbi istifadəçilərin ensiklopediya və digər sorğu materiallarına münasibətinin dəyişməsi ilə bağlıdır. “Microsoft”un ödənişli servisi əvəzinə istifadəçilər daha çox “Wikipedia” kimi resurslara müraciət edirlər.
1993-cü ildə istifadəyə verilmiş “Encatra” əvvəlcə CD və DVD-də təqdim olunmuş, sonradan isə onu internet vasitəsilə də ödənişli əsasda əldə etmək mümkün olmuşdur. Ensiklopediyanın populyarlığı 2001-ci ildə, yəni “Wikipedia” təqdim olunandan sonra azalmağa başlamışdır.
“Encarta”da məlumat “Wikipedia”dan daha gec yenilənir. Mövcud materiala dair hər hansı bir məqalə və ya düzəliş onlayn ensiklopediyada yerləşdirilməzdən əvvəl redaktor tərəfindən yoxlanılır.
Bölmənin digər xəbərləri
