MİKAYIL HÜSEYN OĞLU ABDULLAYEV
Azərbaycan mədəniyyətinə ağır itki üz vermişdir. Müasir Azərbaycan təsviri sənətinin görkəmli nümayəndəsi, xalq rəssamı, Azərbaycan Dövlət mükafatı laureatı, professor Mikayıl Abdullayev 2002-ci il avqustun 21-də ömrünün 81-ci ilində vəfat etmişdir.
Mikayıl Hüseyn oğlu Abdullayev 1921-ci il dekabrın 19-da Bakıda anadan olmuşdur. O, 1939-cu ildə Əzim Əzimzadə adına Azərbaycan Rəssamlıq Məktəbini, 1949-cu ildə isə Surikov adına Moskva Dövlət Rəssamlıq İnstitutunu bitirmişdir.
Gənc yaşlarından yaradıcılığa başlayan Mikayıl Abdullayev qısa bir müddətdə Azərbaycan incəsənətinin inkişafında xüsusi xidmətləri olan mahir fırça ustasına çevrilmişdir. Milli təsviri sənətin inkişafında əvəzsiz rol oynamış rəssamın müxtəlif janr və mövzularda yaratdığı boyakarlıq və qrafika əsərləri ölkəmizin keçdiyi böyük bir dövrün sənət salnaməsi kimi rəssamlıq tariximizə əbədi daxil olmuşdur.
Azərbaycan torpağının gözəllikləri, vətən övladlarının qəhrəmanlığı, doğma yurda, əməyə və sənətə bağlılıq Mikayıl Abdullayevin ilham mənbəyi olmuş və yaradıcılığının başlıca qayəsini təşkil etmişdir. Onun yurdumuzun əsrarəngiz təbiətini əks etdirən tabloları nikbin ruhu ilə seçilən gözəl sənət nümunələrindəndir.
Mikayıl Abdullayevin dərin məhəbbətlə yaratdığı tarixi şəxsiyyətlərin portretlərində personajların daxili aləmi, xarakteri, mənəvi zənginlikləri ustalıqla açılmışdır. Azərbaycan ədəbiyyatının incilərinə, xüsusilə “Kitabi-Dədə Qorqud” dastanlarına və Məhəmməd Füzulinin “Leyli və Məcnun” əsərinə çəkdiyi illüstrasiyalar rəssamın klassik milli irsə hörmət və sevgisinin, ona dərindən bələd olmasının parlaq nümunəsidir. Sənətkarın fırçasından çıxmış portretlər qallereyası və lirik lövhələr insana məhəbbət, vətən eşqi və böyük emosional təsir qüvvəsi ilə aşılanmış, öz milli koloriti, tərbiyəvi əhəmiyyəti ilə səciyyələnərək, neçə-neçə nəslin estetik zövqünün formalaşmasında müstəsna rol oynamışdır.
Mikayıl Abdullayev teatr rəssamı kimi də uğurla fəaliyyət göstərmişdir. Onun monumental janrda yaratdığı əsərlər arasında “Nizami” metro stansiyasına verdiyi gözəl tərtibat mütəxəssislər tərəfindən yüksək qiymətləndirilmişdir.
Mikayıl Abdullayev xarici ölkələrlə bağlı yaratdığı silsilə rəsm əsərləri ilə də Azərbaycan incəsənətinə dünya şöhrəti gətirmişdir. Rəssamın çəkdiyi tablolar XX əsr Azərbaycan boyakarlığı və qrafika sənətinin qiymətli nümunələri kimi xarici ölkələrdə uğurla nümayiş etdirilmiş, Paris, London, Berlin, Roma, Tokio, Monreal, Dehli, Qahirə və başqa şəhərlərin çoxsaylı sənətsevərlərinin dərin rəğbətini qazanmışdır. Avropada təşkil edilmiş fərdi sərgiləri isə sənətkarı fitri istedad sahibi kimi daha da məşhurlaşdırmışdır. Onun Beynəlxalq Nehru mükafatına layiq görülməsi də rəssamın böyük şöhrətinin təsdiqidir.
Mikayıl Abdullayevin Azərbaycan rəssamlıq məktəbinin inkişafında böyük xidmətləri olmuşdur. O, uzun illər pedaqoji sahədə fəaliyyət göstərərək, öz zəngin təcrübəsi və bacarığını gənc rəssamlar nəslinin yetişdirilməsinə sərf etmişdir. Tanınmış rəssamın Azərbaycanın ictimai həyatında fəaliyyəti də səmərəli olmuşdur.
Mikayıl Abdullayevin yaradıcılığı hər zaman Azərbaycan xalqının diqqət mərkəzində olmuş və yüksək qiymətləndirilmişdir. Rəssamın müstəqil respublikamızın ən ali mükafatına - “İstiqlal” ordeninə layiq görülməsi onun sənətinə və şəxsiyyətinə ehtiramın parlaq bir ifadəsidir.
Böyük sənətkar, əsl ziyalı və qayğıkeş insan Mikayıl Hüseyn oğlu Abdullayevin işıqlı xatirəsi xalqımızın qəlbində daim yaşayacaqdır.
Allah rəhmət eləsin!
Heydər Əliyev, Murtuz Ələsgərov,
Artur Rasizadə, Ramiz Mehdiyev,
Elçin Əfəndiyev, Mahmud Kərimov,
Hacıbala Abutalıbov, Fatma Abdullazadə,
Polad Bülbüloğlu, Nizami Xudiyev,
Misir Mərdanov, Fərhad Xəlilov,
Tahir Salahov, Anar Rzayev,
Kamil Əliyev, Ömər Eldarov,
Böyükağa Mirzəzadə, Toğrul Nərimanbəyov,
Oqtay Sadıqzadə, Rasim Babayev,
Rasim Əfəndiyev, Elbəy Rzaquliyev,
Tokay Məmmədov, Nadir Əbdürrəhmanov,
Kamil Nəcəfzadə
X X X
Mərhumun cənazaəsi vidalaşmaq üçün 2002-ci il avqustun 23-də saat 15.00-dan 17.00-dək Rəşid Behbudov adına Dövlət Mahnı Teatrının binasında (Rəşid Behbudov küçəsi, 12) qoyulacaqdır.
Dəfn mərasimi Fəxri xiyabanda keçiriləcəkdir.
Bölmənin digər xəbərləri
