MİLLİ AZLIQLAR MÖVZUSUNDA SEMİNAR
Şərqi Qazaxıstanın mərkəzi Ust-Kamenoqorsk şəhərində “Qazaxıstan xalqlarının sülh və əmin-amanlıq şəraitində yaşaması prinsipləri, etnik qrupların problemləri” mövzusunda seminar keçirilmişdir. Seminarda ölkədə fəaliyyət göstərən ictimai, mədəni cəmiyyət və mərkəzlərin başçıları, Qazaxıstan prezidenti aparatının yüksək səviyyəli nümayəndələri, həmçinin Mədəniyyət və İnformasiya nazirliyinin rəhbərləri iştirak etmişlər. Tədbirdə ölkədə yaşayan 130-dan artıq xalq və millətin problemləri ilə bağlı məsələlər geniş müzakirə olunmuş, bu problemlərdən çıxış yolları müəyyənləşdirilmişdir.
“Turan” konqresinin sədri Müseyib Novruzov öz çıxışında Azərbaycanla Qazaxıstan arasında siyasi, iqtisadi və mədəni əlaqələrin get-gedə daha da gücləndiyini qeyd etmiş, ötən ilin sonlarında Moskvada Azərbaycan Prezidenti Heydər Əliyevlə Qazaxıstan prezidenti Nursultan Nazarbayevin imzaladıqları “Xəzər dənizinin dibinin bölünməsi haqqında” sazişi misal çəkmişdir. M.Novruzov demişdir: - Xəzərin sektorlara bölünməsi məsələsində Azərbaycanla Qazaxıstan eyni mövqedən çıxış edirlər. Bundan başqa Qazaxıstan “Bakı-Tbilisi-Ceyhan” neft kəmərini dəstəkləyir. Məncə bu, çox şey deməkdir.
Sonra M.Novruzov Qazaxıstanda milli azlıqlara yaradılmış şəraitdən danışmış, problemlərin həlli yolları ilə bağlı təkliflərini bildirmişdir.
Qulu Kəngərli
AZƏRTAC-ın xüsusi müxbiri
Ust-Kamenoqorsk
Bölmənin digər xəbərləri
