MİLLİ MƏCLİSDƏ GÖRÜŞ
Sentyabrın 29-da Finlandiya Respublikasının Prezidenti xanım Tarya Halonen Milli Məclisə gəlmişdir. Ali qonağı parlamentin binası önündə Milli Məclisin sədri Murtuz Ələsgərov, parlament sədrinin müavinləri, deputatlar qarşıladılar.
Finlandiya Respublikasının Prezidenti və nümayəndə heyətinin üzvləri Azərbaycan xalqının ümummilli lideri Heydər Əliyevin parlamentin foyesində qoyulmuş büstünə baxdılar, Milli Məclisin muzeyi ilə tanış oldular.
Sonra Milli Məclisin sədri Murtuz Ələsgərovun və Finlandiya Prezidenti Tarya Halonenin görüşü keçirildi.
Murtuz Ələsgərov Milli Məclisin fəaliyyəti barədə məlumat verərək dedi ki, ölkəmiz Avropanın inkişaf etmiş dövlətlərindən olan Finlandiya ilə münasibətlərin inkişafında maraqlıdır. Azərbaycan Milli Məclisində Finlandiya parlamenti ilə dostluq qrupu fəaliyyət göstərir, beynəlxalq təşkilatlar, xüsusən Avropa Şurası, ATƏT çərçivəsində səmərəli əməkdaşlıq ənənələri mövcuddur.
Milli Məclisin sədri Ermənistan-Azərbaycan, Dağlıq Qarabağ münaqişəsindən danışaraq vurğuladı ki, bu, xalqımızın ən ağrılı problemidir və biz onun beynəlxalq hüquq normalarına uyğun həllini tələb edirik.
Murtuz Ələsgərov bildirdi ki, Azərbaycan xalqı və dövləti Finlandiya Prezidentinin bu səfərinin ölkələrimiz arasında münasibətlərin möhkəmlənməsinə, siyasi, iqtisadi, mədəni əlaqələrin inkişafına müsbət təsir göstərəcəyinə ümid bəsləyir.
Finlandiya Prezidenti Tarya Halonen dedi ki, 1996-cı ildə xarici işlər naziri kimi Azərbaycana səfərindən sonra Bakıda böyük dəyişikliklər baş vermişdir. Bu gün keçirdiyim görüşlərdə Azərbaycanın müxtəlif sahələrində xeyli tərəqqi əldə edilməsi barədə məlumat aldım, demokratiya yolunda əsaslı irəliləyiş olmuşdur. Ümidvaram ki, səfər zamanı keçirilən görüşlər, imzalanan sənədlər, Azərbaycan-Finlandiya biznes forumu əlaqələrimizin daha da möhkəmlənməsinə müsbət təsir edəcəkdir.
Dağlıq Qarabağ münaqişəsi barədə kifayət qədər məlumatlı olduğunu bildirən ali qonaq, ölkəsinin bu problemin ATƏT-in Minsk qrupu çərçivəsində sülh danışıqları yolu ilə həllini dəstəklədiyini söylədi. Xanım Halonen xatırlatdı ki, gələn ilin ikinci yarısından Avropa İttifaqında sədrlik edəcək Finlandiya Azərbaycanın Avropaya inteqrasiyasını, beynəlxalq təşkilatlarla əlaqələrinin daha da möhkəmlənməsini dəstəkləyəcəkdir.
Hazırda müxtəlif partiyaların təmsil olunduğu, Milli Məclisə qarşıdan gələn seçkilərin də azad, ədalətli, demokratik şəraitdə keçirilməsi istiqamətində ölkə rəhbərliyinin səylərinin müsbət nəticə verəcəyinə ümid etdiyini bildirən xanım Tarya Halonen dedi ki, əgər rəsmi dəvət olarsa, seçkilərdə Finlandiya parlamenti də müşahidəçilər göndərə bilər.
Finlandiya Respublikasının Prezidenti və Milli Məclisin sədri görüşdən xatirə olaraq bir-birinə hədiyyələr təqdim etdilər, nümayəndə heyətinin üzvləri ilə birgə xatirə şəkli çəkdirdilər.
Görüş başa çatdıqdan sonra xanım Tarya Halonen və onu müşayiət edən şəxslər parlamentin iclas salonu ilə tanış oldular.
Bölmənin digər xəbərləri
