Bolqarıstan Prezidenti və nümayəndə heyətinin üzvləri Milli Məclisin muzeyi ilə tanış oldular.

Sonra Milli Məclisin sədri Murtuz Ələsgərov və Bolqarıstan Prezidenti Georgi Pırvanov arasında görüş keçirildi.

Milli Məclisin sədri Murtuz Ələsgərov görüşü açaraq, Bolqarıstan Prezidentini Azərbaycanın ali qanunverici orqanında səmimiyyətlə salamladı. O xatırlatdı ki, bu yaxınlarda respublikamızın parlament nümayəndə heyəti Bolqarıstanda olmuş, Bolqarıstan dövlətinin başçısı ilə görüşmüş, iki ölkə arasında qarşılıqlı surətdə faydalı münasibətlərin inkişaf perspektivlərini müzakirə etmişdir. Milli Məclisin sədri dedi: “Səfər zamanı deputatlarımız Bolqarıstan parlamentinin sədri, parlamentin və Bolqarıstan-Azərbaycan dostluq qrupunun üzvləri ilə də görüşmüş, qanunverici orqanların əməkdaşlığına dair bir sıra məsələləri müzakirə etmişlər”.

M.Ələsgərov qarşılıqlı münasibətlərimizin böyük tarixi olduğunu xatırlatdı, hələ sovet dövründə Bolqarıstan ilə Azərbaycan arasında çox yaxşı, mehriban əlaqələr yarandığını bildirdi. O vurğuladı ki, indi ticarət-iqtisadi, elmi-texniki əlaqələr ənənəsini bərpa etmək lazımdır.

Milli Məclisin sədri dedi ki, dövlətlərimiz arasında hazırkı qarşılıqlı münasibətlərin əsası Azərbaycan dövlət müstəqilliyi əldə etdikdən sonra Prezident Heydər Əliyev tərəfindən qoyulmuşdur. 1995-ci ildə ümummilli liderimizin Bolqarıstana rəsmi səfəri zamanı dostluq münasibətlərimizin təməli qoyulmuş, mühüm sənədlər imzalanmışdır. Ticarət-iqtisadi komissiya, elmi-texniki komissiya yaradılmışdır. Onların fəaliyyəti nəticəsində ticarət-iqtisadi münasibətlərimizin daha da inkişafına və dərinləşməsinə dair onlarca yeni saziş imzalanmışdır.

Murtuz Ələsgərov ölkələrimizin prezidentlərinin imzaladıqları və siyasi dialoqu, iqtisadi və mədəni əlaqələri bundan sonra da inkişaf etdirmək vəzifəsini qarşıya qoyan Birgə bəyannaməni yüksək qiymətləndirdi. O, həmçinin ümidvar olduğunu bildirdi ki, parlament üzvlərinin növbəti görüşü Azərbaycan torpağında keçiriləcəkdir.

Parlamentin sədri iki ölkə ali məktəblərinin hələ SSRİ dövründə mövcud olmuş əməkdaşlıq ənənələrini bərpa etməyin vacibliyindən danışdı, Bolqarıstan Prezidentini Bakı Slavyan Universitetinin fəxri doktoru adı alması münasibətilə təbrik etdi.

Murtuz Ələsgərov Bolqarıstan dövlətinin başçısına Azərbaycanda aparılan islahatlar barədə də məlumat verdi. O dedi ki, qısa müddət ərzində amnistiya, əfv haqqında onlarca sənəd qəbul olunmuşdur, demokratiyanın inkişaf etdirilməsi, insanın və vətəndaşın hüquq və azadlıqlarının təmin edilməsi sahəsində böyük işlər görülür. Azərbaycan Avropa Şurasının, ATƏT-in və digər beynəlxalq təşkilatların bir çox konvensiya və sazişlərinə qoşulmuşdur.

Murtuz Ələsgərov Ermənistan-Azərbaycan, Dağlıq Qarabağ münaqişəsindən danışaraq bildirdi ki, ölkəmiz bu problemin dincliklə nizama salınmasına tərəfdardır. O dedi: “Siz bəyan etdiniz ki, ATƏT-in əvvəlki sədrlərindən fərqli olaraq, Bolqarıstan Dağlıq Qarabağ probleminin nizama salınması işində öz rolunu gücləndirəcəkdir. Bu problem xalqımız qarşısında çox kəskin şəkildə durur, çünki ərazilərimizin 20 faizi işğal edilmişdir, 1 milyondan çox qaçqın-köçkün var. Heç bir ölkədə 8 milyon əhalinin 1 milyonu qaçqın-köçkün deyildir. Ona görə də böyük dövlətlər, beynəlxalq təşkilatlar bu problemin tezliklə həllinə ciddi diqqət yetirməlidirlər. Azərbaycan bu məsələdə perspektivi aydın təsəvvür edir. Biz hesab edirik ki, bu problem Azərbaycanın ərazi bütövlüyü və sərhədlərinin toxunulmazlığı nəzərə alınmaqla, yəni hamılıqla qəbul edilmiş beynəlxalq hüquq normaları əsasında həll olunmalıdır. Başqa yol yoxdur. Prezidentimiz demişdir ki, ölkənin ərazi bütövlüyü məsələsində heç bir kompromis ola bilməz, lakin biz münaqişəni sülh yolu ilə həll etmək istəyirik və problemin bütün xüsusiyyətlərini ATƏT-in sədri olaraq sizinlə də, Ermənistan tərəfi ilə də, digər əlaqədar dövlətlərlə də müzakirə etməyə hazırıq.

Parlamentin rəhbəri ümidvar olduğunu söylədi ki, ATƏT-də sədrlik edən ölkə kimi Bolqarıstan bu problemin yaxın vaxtlarda həlli üçün maksimum səy göstərəcəkdir.

Bolqarıstan Prezidenti Georgi Pırvanov Milli Məclisdə görüşdən məmnun qaldığını bildirdi. O qeyd etdi ki, son vaxtlar həyata keçirilən əlaqələrimizi nəzərə alaraq, biz cəsarətlə belə bir nəticə çıxara bilərik ki, bütün istiqamətlərdə ikitərəfli münasibətlərin fəallaşdığı göz qabağındadır. Dövlət başçıları arasında fəal danışıqlar prosesi ilə yanaşı, icra hakimiyyəti səviyyəsində, o cümlədən hökumətlərarası komissiya çərçivəsində də ikitərəfli əlaqələr var.

Bolqarıstan dövlətinin başçısı vurğuladı ki, münasibətlərin inkişafında hər iki ölkənin parlamentləri də fəal rol oynayırlar. Georgi Pırvanov Milli Məclis üzvlərinin Bolqarıstana bu yaxınlarda səfərini xatırladı və onun geniş əks-səda doğurduğunu qeyd edərək dedi ki, parlamentin roluna bir neçə istiqamətdə baxmaq lazımdır. Təbii ki, ilk növbədə, parlamentlərin sədrləri özlərinin fəallığı və qarşılıqlı əlaqələri ilə nümunə göstərməlidirlər. Bununla yanaşı, parlamentlər çərçivəsində işləyən dostluq qrupları da mühüm rol oynamalıdır. Fəaliyyətin xüsusiyyətlərini nəzərə alaraq, parlament komissiyaları səviyyəsində də daha geniş qarşılıqlı fəaliyyət göstərmək lazımdır.

Bolqarıstan Prezidenti xatırlatdı ki, 1995-ci ildən bəri parlamentlərimiz fəal işləyir, müqavilə-hüquqi baza yaxşılaşır və təkmilləşir. Bu isə sənədlərin ratifikasiyasında parlamentlərin rolu nəzərə alınmaqla çox mühümdür.

Onun sözlərinə görə, daha bir çox mühüm cəhət Avratlantik inteqrasiyasına aid strateji məqsədlərimizlə bağlıdır. Bolqarıstan öz müqavilə-hüquqi bazasını, qanunlarını Avropa Birliyinin tələblərinə uyğunlaşdıranadək uzun bir yol keçmişdir. Qonşuluq siyasəti barəsində elan edilmiş yeni Avropa proqramı bu yolla gedən ölkələrimizin – Azərbaycanın da, Bolqarıstanın da aydın və dəqiq perspektivə malik olduğunu göstərir. Odur ki, Prezident də, parlament də bu proqramın tezliklə və uğurla həyata keçirilməsinə kömək edə bilərlər. Bundan əlavə, qanunvericilik normalarını Avropa Birliyinin tələblərinə uyğunlaşdırmaq sahəsində Bolqarıstan parlamentinin topladığı zəngin təcrübə Azərbaycan parlamentinə faydalı ola bilər.

Prezident Georgi Pırvanov Dağlıq Qarabağ problemindən danışaraq vurğuladı ki, Bolqarıstan ATƏT-də sədrliyə başlayan kimi bu məsələdə fəal mövqe tutmuşdur. Xarici işlər naziri də, ATƏT sədrinin göndərdiyi nümayəndə heyəti də sülhyaratma prosesini gücləndirməyə, habelə bu ideyanın təcəssüm tapmasına uyğun olan formatları dəqiqləşdirməyə dair danışıqlar aparmışlar. Bolqarıstan Prezidenti dedi: “Münaqişənin dincliklə nizama salınması barədə konkret təkliflər irəli sürən Minsk qrupunun fəaliyyətini gücləndirmək bizim üçün çox vacibdir. Dünən biz cənab Prezident İlham Əliyevlə danışıqlarımız zamanı dedik ki, Avropa Birliyinin bu münaqişənin həlli prosesinə daha yaxından cəlb olunması üçün bütün zəruri işləri görmək lazımdır. Odur ki, Avropa Birliyinin gələcək üzvü kimi Bolqarıstan buna kömək edəcəkdir”.

X X X

Görüşdən sonra Bolqarıstan Prezidenti parlament rəhbərliyi ilə xatirə şəkli çəkdirdi, Milli Məclisin iclas salonuna baxdı, Heydər Əliyevin abidəsini ziyarət etdi, ümummilli liderimizin nurlu xatirəsini bir dəqiqəlik sükutla andı, abidənin qarşısında şəkil çəkdirdi.