MİLLİ MƏCLİSDƏ GÖRÜŞ
Müqəddəs apostol Andrey Pervozvannı Fondunun prezidenti Aleksandr Melnik başda olmaqla Böyük knyaginya Yelizaveta Fyodorovna və rahibə Varvaranın cəsədlərinin qalıqlarını nümayiş etdirmək üçün Bakıya gətirən nümayəndə heyəti Milli Məclis sədrinin müavini Gövhər Baxşəliyeva ilə görüşmüşdür.
Qonaqları səmimi salamlayan G.Baxşəliyeva Yelizaveta Fyodorovnanın xeyriyyəçilik fəaliyyətindən, insanlara olan sevgisindən danışdı, knyaginyanın cəsədinin qalıqlarının nümayiş etdirilməsini təqdirəlayiq hal kimi qiymətləndirdi. O, Azərbaycanda din azadlığı və dözümlülüyü, dini icmalar arasındakı xoş münasibət barədə ətraflı məlumat verdi. Dedi ki, knyaginyanın cəsədinin qalıqlarının qoyulduğu Mirodaşıyan müqəddəs zövcələr kilsəsi məşhur xeyriyyəçi Hacı Zeynalabdin Tağıyev tərəfindən tikilmiş, Azərbaycan xalqının ümummilli lideri Heydər Əliyevin təşəbbüsü ilə son dövrlərdə dövlət vəsaiti hesabına əsaslı təmir edilmişdir.
G.Baxşəliyeva, həmçinin Heydər Əliyevin ciddi səyi nəticəsində Azərbaycanda rus dilinə və rusdilli əhaliyə, eləcə də digər millətlərin nümayəndələrinə sərbəstlik verilməsindən, müxtəlif xalqların nümayəndələrinin dinc yanaşı, əmin-amanlıq şəraitində yaşamasından söz açdı. O xatırlatdı ki, bu və digər xidmətlərinə, eləcə də Azərbaycan-Rusiya münasibətlərinin inkişafındakı roluna görə Rusiya dövləti və hökumətinin qərarı ilə dünya şöhrətli siyasi xadim Heydər Əliyev “Müqəddəs apostol Andrey Pervozvannı” ordeni ilə təltif olunmuşdur.
Sonra G.Baxşəliyeva regiondakı vəziyyət, Ermənistan-Azərbaycan, Dağlıq Qarabağ münaqişəsi barədə qonaqlara ətraflı məlumat verdi, beynəlxalq təşkilatların köməyi sayəsində problemin sülh yolu ilə həllini tapacağına əmin olduğunu vurğuladı.
Nümayəndə heyətinin başçısı, Müqəddəs apostol Andrey Pervozvannı Fondunun prezidenti Aleksandr Melnik səmimi qəbul və ətraflı məlumat üçün minnətdarlıq etdi. Dedi ki, knyaginya Yelizaveta Fyodorovnanın cəsədinin qalıqlarının dünya ölkələrində nümayiş etdirilməsi Rusiya Pravoslav kilsəsinin Moskva Patriarxı ilə birgə hazırladığı ilk proqram əsasında həyata keçirilir. Layihənin əsas məqsədi knyaginyanın fəaliyyəti, insanpərvərliyi, xeyriyyəçiliyi barədə dünya ictimaiyyətinə məlumat verməkdir. Rəhbərlik etdiyi qurum bununla dünyanı sülhə, əmin-amanlığa çağırır, Avropa Şurası ilə birgə münaqişə bölgələrində tərəflər arasında dialoq təşkil edir. Artıq Balkanlardakı münaqişə ilə əlaqədar Kosovoda belə bir dəyirmi masa təşkil olunmuş, nailiyyət qazanılmışdır. Ümid edirik ki, Dağlıq Qarabağ münaqişəsi ilə də bağlı tərəflər arasında davamlı sülhlə nəticələnə bilən dialoq qura biləcəyik.
Sonda Gövhər Baxşəliyeva qonaqlara “Azərbaycan Parlamenti və beynəlxalq təşkilatlar” kitabını təqdim etmişdir. Qonaqlar da öz növbəsində Milli Məclis sədrinin müavininə hədiyyələr bağışlamışlar.
Bölmənin digər xəbərləri
