MİLLİ MƏCLİSDƏ GÖRÜŞ
Ölkəmizdə səfərdə olan Bolqarıstan parlamentinin nümayəndə heyəti yanvarın 24-də Milli Məclisin regional məsələlər daimi komissiyasının üzvləri ilə görüşmüşdür.
Komissiyanın sədri Zahid Qaralov qonaqları səmimi salamladıqdan sonra ölkələrimiz arasındakı dostluq əlaqələrinin tarixindən danışmış, Azərbaycan-Bolqarıstan münasibətlərinin inkişafında dövlətlərimizin başçılarının rolunu və qarşılıqlı səfərlərin əhəmiyyətini xüsusi vurğulamış, bu səfərin də əlaqələrimizin inkişafına təkan verəcəyinə ümidvar olduğunu bildirmişdir.
Sonra Z.Qaralov rəhbərlik etdiyi komissiyanın, bələdiyyələrin fəaliyyəti, beynəlxalq əməkdaşlığı barədə ətraflı məlumat vermiş, Azərbaycanın Bolqarıstanla bu sahədə də əlaqələr qurmağa hazır olduğunu diqqətə çatdırmışdır.
Bolqarıstan-Azərbaycan parlamentlərarası dostluq qrupunun rəhbəri, nümayəndə heyətinin başçısı Rəmzi Osman səmimi qəbula və ətraflı məlumata görə minnətdarlıq etmiş, ölkələrimiz arasında əlaqələrin inkişafında dövlətlərimizin başçılarının rolunu xüsusi qeyd etmişdir. Qonaq demişdir ki, Bolqarıstanda bələdiyyələrlə əlaqədar xüsusi proqram hazırlanmışdır və Azərbaycanın da bu təcrübəni öyrənməsi müsbət nəticə verə bilər.
Daha sonra görüşdə bələdiyyə qurumları arasında əlaqələrin inkişaf perspektivləri, qarşılıqlı səfərlərin təşkili, qanunvericilik aktları, bu sahədə təcrübə mübadiləsinin genişləndirilməsi və digər məsələlər ətrafında fikir mübadiləsi aparılmışdır.
X X X
Yanvarın 24-də Bolqarıstan parlamentinin nümayəndə heyəti Bakının mərkəzi küçələrini gəzmiş, İçərişəhər və Fəvvarələr meydanı ilə tanış olmuşlar.
Qonaqları Milli Məclisin Azərbaycan-Bolqarıstan parlamentlərarası dostluq qrupunun üzvləri müşayiət etmişlər.
Bölmənin digər xəbərləri
