MİLLİ MƏCLİSDƏ GÖRÜŞ
Ali qonağı parlamentin binası önündə Milli Məclisin sədri Oqtay Əsədov, sədrin birinci müavini Ziyafət Əsgərov, müavinlər Bahar Muradova, Valeh Ələsgərov, Milli Məclis Aparatının rəhbəri Səfa Mirzəyev və digər rəsmi şəxslər qarşıladılar.
Prezident Abdullah Gül və nümayəndə heyətinin üzvləri parlament binasında Heydər Əliyev Xatirə muzeyi ilə tanış oldular. Qonaqlara muzey barədə ətraflı məlumat verildi.
Sonra Milli Məclisin sədri Oqtay Əsədov və Türkiyə Prezidenti Abdullah Gül arasında görüş keçirildi.
Ali qonağı və onu müşayiət edən nümayəndə heyətini səmimiyyətlə salamlayan Oqtay Əsədov dost ölkənin dövlət başçısı Abdullah Gülü Türkiyənin 11-ci Prezidenti seçilməsi münasibətilə təbrik etdi və gələcək fəaliyyətində ona uğurlar arzuladı.
Milli Məclisin sədri dedi ki, eyni kökə, tarixə, mədəniyyətə malik olan Türkiyə ilə Azərbaycan arasında əlaqələr sürətlə inkişaf edir. Ümummilli liderimiz Heydər Əliyevin dediyi kimi, biz bir millət, iki dövlətik. Böyük inkişaf yolu keçmiş Türkiyə indi Avropanın ən nüfuzlu və qüdrətli dövlətlərindən biridir. Azərbaycan bundan qürur duyur. İki qardaş ölkə arasında əlaqələr Sovet İttifaqı dövründə də olmuşdur. Amma Azərbaycan müstəqilliyini ikinci dəfə bərpa etdikdən sonra münasibətlərimiz daha da inkişaf etmiş, strateji tərəfdaşlıq səviyyəsinə yüksəlmişdir.
İqtisadi əlaqələrdən, türkiyəli iş adamlarının Azərbaycan iqtisadiyyatına böyük həcmdə sərmayə qoymasından danışan Oqtay Əsədov Azərbaycan və Türkiyənin beynəlxalq əhəmiyyətli layihələrin təşəbbüskarı və iştirakçısı olduğunu xatırlatdı. O dedi ki, Bakı-Tbilisi-Ceyhan, Bakı-Tbilisi-Ərzurum neft və qaz kəmərləri, Bakı-Tbilisi-Qars dəmir yolu layihəsi Avropa üçün də böyük önəm daşıyır.
Parlamentlərarası əlaqələrdən söhbət açan sədr Milli Məclisdə dünyanın 70-dən çox ölkəsi ilə dostluq qrupunun fəaliyyət göstərdiyini və bunlardan ən böyüyünün məhz Azərbaycan-Türkiyə parlamentlərarası dostluq qrupu olduğunu söylədi. O bildirdi ki, Türkiyənin Dağlıq Qarabağ münaqişəsi ilə bağlı mövqeyini, Azərbaycanın ərazi bütövlüyünü daim dəstəkləməsini xalqımız yüksək qiymətləndirir. Azərbaycan da Şimali Kipr məsələsində və PKK ilə mübarizədə Türkiyənin mövqelərini müdafiə edir və daim onun yanındadır.
İki qardaş ölkə arasında münasibətlərin daha da möhkəmləndirilməsi üçün siyasi iradənin olduğunu vurğulayan Prezident Abdullah Gül dedi ki, Türkiyə Böyük Millət Məclisində və Azərbaycanın Milli Məclisində fəaliyyət göstərən dostluq qrupları bu iradədən səmərəli bəhrələnməlidir.
X X X
Sonra Türkiyə Prezidenti Abdullah Gül Milli Məclisin deputatları ilə görüşdü.
Azərbaycan parlamentinin deputatları ali qonağı alqışlarla qarşıladılar.
Görüşü Milli Məclisin sədri OQTAY ƏSƏDOV açaraq dedi:
-Hörmətli Milli Məclis üzvləri!
Əziz qonaqlar!
Hörmətli xanımlar və cənablar!
Türkiyə Respublikasının yeni seçilmiş on birinci Prezidenti Abdullah Gül ilk rəsmi səfərini Azərbaycana etmişdir. Dünən Azərbaycan Respublikasının Prezidenti cənab İlham Əliyevin söylədiyi kimi, Türkiyə-Azərbaycan əlaqələri, dostluğu və qardaşlığının dünyada analoqu yoxdur. Bu münasibətlərin bariz nümunəsi kimi, Türkiyə Respublikasının yeni Prezidenti ilk səfərini Azərbaycana etmişdir. Biz çox şadıq ki, möhtərəm Prezident Abdullah Gül parlamentlərarası əlaqələrin inkişafına böyük önəm verərək, səfərin ikinci günü Milli Məclisə təşrif buyurmuşdur.
Zati-aliləri, bizim deputatlarımız və mən Sizin dəyərli fikirlərinizi bölüşməyinizdən çox şərəf duyardıq.
İndi isə icazə verin, sözü Türkiyə Respublikasının Prezidenti zati-aliləri cənab Abdullah Gülə verim. Cənab Prezident, buyurun.
Bölmənin digər xəbərləri
