MİLLİ MƏCLİSDƏ GÖRÜŞ
AZƏRTAC xəbər verir ki, Moldova Prezidenti Vladimir Voronin aprelin 24-də Milli Məclisə gəlmişdir. Parlamentin binası önündə ali qonağı Milli Məclisin sədri Oqtay Əsədov, sədrin birinci müavini Ziyafət Əsgərov, müavinlər Bahar Muradova, Valeh Ələsgərov, Milli Məclis Aparatının rəhbəri Səfa Mirzəyev və digər rəsmi şəxslər qarşıladılar. Moldova Prezidenti əvvəlcə Milli Məclisin iclas salonu, parlamentdəki Heydər Əliyev xatirə salonu ilə tanış oldu. Ulu öndərin həyat və fəaliyyətini əks etdirən fotoşəkillər, qiymətli sənədlər ali qonaqda və nümayəndə heyətinin üzvlərində maraq doğurdu. Azərbaycan parlamentinin formalaşmasında və xarici ölkələrin parlamentləri ilə əlaqələrinin qurulmasında ulu öndərin müstəsna xidmətləri, eləcə də Milli Məclisin qəbul etdiyi mühüm qərarlar, hüquqi sənədlər barədə Moldova rəhbərinə məlumat verildi. Ali qonaq xatirə kitabına ürək sözlərini yazdı.
Sonra Prezident Vladimir Voronin və Milli Məclisin sədri Oqtay Əsədovun görüşü oldu.
O.Əsədov vurğuladı ki, Azərbaycanla Moldova arasındakı qədim tarixi olan dostluq əlaqələri müstəqilliyimizin bərpasından sonra yüksələn xətlə inkişaf edir. Ölkələrimiz arasındakı mövcud münasibətləri müsbət dəyərləndirən parlamentin sədri dedi ki, dövlətlərimizin başçılarının qarşılıqlı səfərləri zamanı imzalanmış çoxsaylı sənədlər ikitərəfli əməkdaşlığın daha da genişlənməsi üçün möhkəm hüquqi baza yaratmışdır.
Parlamentlərarası əlaqələrdən danışan Oqtay Əsədov Moldova-Azərbaycan parlamentlərarası dostluq qrupunun fəaliyyətini, deputatların beynəlxalq tədbirlərdə keçirdikləri görüşləri və bir sıra məsələlərdə eyni mövqedən çıxış etmələrini müsbət qiymətləndirdi. Milli Məclisin sədri Azərbaycan parlamentinin 90 illiyi ilə bağlı yubiley tədbirlərində moldovalı həmkarlarının da iştirak edəcəyinə ümidvar olduğunu bildirdi.
Daha sonra Ermənistan-Azərbaycan, Dağlıq Qarabağ münaqişəsindən danışan Oqtay Əsədov hər iki ölkənin separatizmdən əziyyət çəkdiyini söylədi, BMT Baş Məclisində Azərbaycanın irəli sürdüyü qətnamə layihəsini Moldovanın dəstəkləməsinə görə təşəkkür etdi.
Prezident Vladimir Voronin dedi ki, demokratiya yolu ilə irəliləyən Moldova ilə Azərbaycan arasında siyasi əlaqələrin sürətli inkişafı iki ölkə arasında bütün sahələrdə əməkdaşlığın genişlənməsinə və daha da dərinləşməsinə təkan verir. Dost ölkəyə səfər etdiyini vurğulayan ali qonaq parlamentlərin, qəbul edilən hüquqi sənədlərin cəmiyyətdə, ictimai-siyasi proseslərdə böyük rol oynadığını bildirdi, iki ölkənin deputatlarının beynəlxalq qurumlardakı birgə fəaliyyətinin xüsusi əhəmiyyətindən danışdı. Moldova rəhbəri bildirdi ki, onun ölkəsi beynəlxalq tədbirlərdə Azərbaycanın haqlı mövqeyini bundan sonra da dəstəkləyəcəkdir. Prezident Vladimir Voronin Moldovadakı Azərbaycan diasporunun fəaliyyətini də yüksək qiymətləndirdi.
Dnestryanı bölgə ilə bağlı problemin dinc vasitələrlə həllinə çalışdıqlarını vurğulayan ali qonaq Azərbaycanın da Dağlıq Qarabağ problemini tezliklə həll etməsini arzuladıqlarını bildirdi.
 |
 |
Bölmənin digər xəbərləri
