MİLLİ MƏCLİSDƏ GÖRÜŞ
Yanvarın 8-də Milli Məclisin sədri Murtuz Ələsgərov Türkiyənin Ədalət və İnkişaf Partiyasının sədri Rəcəb Tayyib Ərdoğanla və onun başçılıq etdiyi nümayəndə heyətinin üzvləri ilə görüşmüşdür.
Murtuz Ələsgərov qonaqları səmimiyyətlə qarşıladı, onlara “Müstəqil dövlətimiz və parlamentimiz” kitabı hədiyyə edildi.
Parlamentin sədri Türkiyə-Azərbaycan münasibətlərinin inkişafından ətraflı danışaraq, ikitərəfli əlaqələrin möhkəmlənməsində dövlət başçılarının rolunu xüsusi vurğuladı. O dedi ki, Azərbaycan Prezidenti Heydər Əliyevin Türkiyəyə dəfələrlə etdiyi səfərlər, onların gedişində keçirdiyi görüşlər qarşılıqlı surətdə faydalı münasibətlərin hüquqi bazasının yaradılmasında böyük rol oynamışdır. İki ölkə rəhbərlərinin imzaladıqları sənədləri Milli Məclis ratifikasiya etmişdir. Ölkələrimizin parlament üzvlərinin beynəlxalq təşkilatlar çərçivəsində sıx əlaqələri uğurlu əməkdaşlığa daha bir misaldır. Bu baxımdan Azərbaycanın AŞPA-dakı nümayəndə heyətinin rəhbəri İlham Əliyev Türkiyə və Azərbaycan parlamentləri təmsilçilərinin birgə fəaliyyətinə böyük əhəmiyyət verir.
Milli Məclisin sədri qonaqlara ölkəmizdə aparılan siyasi, iqtisadi və hüquqi islahatlar, Ermənistan-Azərbaycan, Dağlıq Qarabağ münaqişəsinin səbəbi və ağır nəticələri barədə də ətraflı məlumat verdi.
Rəcəb Tayyib Ərdoğan Bakıya ikinci səfərindən böyük məmnunluq duyduğunu bildirərək dedi ki, Azərbaycanda əldə olunmuş uğurları və böyük tərəqqini Türkiyədə diqqətlə izləyirlər. O, Türkiyə və Azərbaycanın Ermənistanla münasibətlərinin perspektivlərindən söz açaraq, bu ölkənin Azərbaycana qarşı indiyədək təcavüzkar siyasət yeritdiyini və Türkiyəyə də ərazi iddiaları irəli sürdüyünü söylədi. Cənab Ərdoğan vurğuladı ki, Ermənistan beynəlxalq hüquq normalarına və qonşu dövlətlərin hüquqlarına hörmət göstərmədiyinə görə, onunla normal münasibətlər yaradılmasından heç bir söhbət gedə bilməz. Türkiyə ATƏT-in Minsk qrupu çərçivəsində danışıqlar prosesinin indiyədək heç bir nəticə verməməsindən də narahatdır.
Rəcəb Tayyib Ərdoğan Türkiyə ilə Azərbaycan arasında iqtisadi və mədəni əməkdaşlıq məsələlərindən də danışdı, Bakı-Tbilisi-Ceyhan neft və Bakı-Ərzurum qaz kəmərlərinin əhəmiyyətini xüsusi nəzərə çarpdırdı.
Görüşün sonunda Rəcəb Tayyib Ərdoğana Azərbaycan parlamenti adından nəfis xalca hədiyyə edildi. Qonaqlar da Milli Məclisin sədri Murtuz Ələsgərova hədiyyələrini təqdim etdilər. Sonra xatirə şəkli çəkdirildi. Paytaxtın yüksək nöqtəsində yerləşən parlamentin binasından Bakını bir daha seyr edən türkiyəli qonaqlar onun dünyanın ən gözəl şəhərlərindən biri olduğunu söylədilər.
Görüşdə Milli Məclis sədrinin birinci müavini Arif Rəhimzadə, parlament sədrinin müavinləri Gövhər Baxşəliyeva və Ziyafət Əsgərov, Milli Məclis Aparatının rəhbəri Səfa Mirzəyev, parlamentin daimi komissiyalarının sədrləri, Türkiyənin Azərbaycandakı səfiri Əhməd Ünal Çeviköz, Azərbaycanın Türkiyədəki səfiri Məmməd Əliyev, digər rəsmi şəxslər iştirak edirdilər.
Bölmənin digər xəbərləri
