MİLLİ MƏCLİSİN İCLASINDA
AZƏRTAC xəbər verir ki, iclasda “Qan və onun komponentlərinin donorluğu və qan xidməti haqqında” və “Elektron ticarət haqqında” qanun layihələri müzakirə olunmuşdur.
Sosial siyasət daimi komissiyasının üzvü Musa Quliyev “Qan və onun komponentlərinin donorluğu və qan xidməti haqqında” qanun layihəsi barədə məlumat verərək bildirmişdir ki, burada qan və onun komponentlərinin donorluğunun inkişafı, bu sahədəki münasibətlərin tənzimlənməsi ilə yanaşı, qan xidmətinin təşkilinin əsasları da öz əksini tapmışdır.
Müzakirələr zamanı donorluğa görə yuxarı yaş həddi ilə bağlı məhdudiyyətin aradan qaldırılması, donorluğun pullu olması, donorların sosial müdafiəsi və qan bankının yaradılması məsələlərinin də layihədə öz əksini tapması təklif edilmişdir.
Layihə səsə qoyularaq əsas kimi birinci oxunuşda qəbul olunmuşdur.
Sonra elm və təhsil məsələləri daimi komissiyasının sədri Şahlar Əsgərov “Elektron ticarət haqqında” qanun layihəsi barədə məlumat vermişdir.
Müzakirələr zamanı qeyd olunmuşdur ki, bu qanunun məqsədi Azərbaycan Respublikasında müasir informasiya texnologiyaları vasitəsilə ticarətin (elektron ticarət) həyata keçirilməsinin hüquqi əsaslarını, onun aparılma qaydalarını və prosesdəki iştirakçıların hüquq və vəzifələrini müəyyən etməkdən ibarətdir. Qanun elektron ticarətin həyata keçirilməsi zamanı şəxslər arasında bağlanan və onların iştirakı ilə həyata keçirilən müqavilələr və digər hüquqi fəaliyyətləri zamanı yaranan münasibətləri tənzimləyir.
Geniş müzakirələrdən sonra bu layihə də birinci oxunuşda qəbul olunmuşdur.
Bölmənin digər xəbərləri
