MİLLİ MƏCLİSİN KOMİSSİYASINDA
AZƏRTAC-ın müxbiri xəbər verir ki, iclasda Azərbaycan Respublikası Hökuməti ilə Belarus Respublikası Hökuməti arasında hava əlaqəsi və sərbəst ticarət haqqında Saziş layihələri, “Azərbaycan Respublikasının Mülki Məcəlləsinin tətbiqi ilə əlaqədar bəzi qanunvericilik aktlarına əlavələr və dəyişikliklər edilməsi və bəzi qanunvericilik aktlarının qüvvədən düşmüş hesab edilməsi haqqında” və “Vergi Məcəlləsinə dəyişiklik edilməsi haqqında” qanun layihələri müzakirə olunmuşdur. Müzakirələr zamanı qeyd olunmuşdur ki, adları çəkilən sazişlər Azərbaycanın maraqlarına tam cavab verir. Vergi Məcəlləsinə edilən dəyişiklik isə bir növ ölkəmizdən tranzit kimi istifadə edən xarici avtomobillərə güzəşt kimi nəzərdə tutulmuşdur.
İclasda iştirak edən Milli Məclis sədrinin birinci müavini Arif Rəhimzadə, təbii ehtiyatlar, energetika və ekologiya məsələləri daimi komissiyasının sədri Asya Manafova, sosial siyasət daimi komissiyasının sədr müavini Aydın Mirzəzadə, dəvət olunmuş şəxslər layihələrlə bağlı rəy və təkliflərini bildirmişlər. Sonda layihələrin Milli Məclisin müzakirəsinə çıxarılması qərara alınmışdır.
Bölmənin digər xəbərləri
