Bakı, 24 iyun (AZƏRTAC). İyunun 24-də Azərbaycan Respublikası Milli Məclisinin növbədənkənar sessiyasının sonuncu iclası keçirilmişdir.

AZƏRTAC xəbər verir ki, Milli Məclisin sədri Oqtay Əsədov əvvəlcə iclas iştirakçılarını qarşıdan gələn Silahlı Qüvvələr Günü münasibətilə təbrik etmiş, ordumuza güc və möhtəşəmlik arzulamışdır.

Sonra gündəlikdəki məsələlərin müzakirəsi başlanmışdır.

Parlamentin hüquq siyasəti və dövlət quruculuğu komitəsinin sədri Əli Hüseynli “Azərbaycan Respublikasının insan hüquqları üzrə müvəkkili (ombudsman) haqqında” Azərbaycan Respublikasının Konstitusiya Qanununa əlavələr və dəyişikliklər edilməsi barədə” Konstitusiya Qanununu müzakirəyə təqdim etmişdir. Bildirilmişdir ki, 6 ay əvvəl Konstitusiya Qanununa dəyişikliklər edilmişdir. Bunlardan biri Azərbaycan Respublikasının iştirakçısı olduğu BMT-nin “İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiya”sının Fakültativ Protokolunda nəzərdə tutulmuş milli preventiv mexanizmin funksiyalarının Azərbaycan Respublikasının insan hüquqları üzrə müvəkkilinə (ombudsmana) verilməsidir. Digər dəyişiklik “İnformasiya əldə etmək haqqında” Qanunda nəzərdə tutulmuş informasiya məsələləri üzrə müvəkkilin səlahiyyətlərinin insan hüquqları üzrə müvəkkilə (ombudsmana) həvalə olunmasıdır.

Müzakirələrdən sonra Konstitusiya Qanununun təkrar səsverməsi keçirilmişdir və təsdiq olunmuşdur.

Milli Məclisin iqtisadi siyasət komitəsinin sədri Ziyad Səmədzadə “Azərbaycan Respublikası Gömrük Məcəlləsinin təsdiq edilməsi haqqında” qanun layihəsi barədə (üçüncü oxunuş) məlumat vermişdir. Qeyd olunmuşdur ki, əvvəlki müzakirələr zamanı deputatlar layihə ilə bağlı bir sıra təkliflərlə çıxış etmişlər. Həmin təkliflər nəzərə alınmaqla layihə üçüncü oxunuşa mükəmməl səviyyədə hazırlanmışdır.

Ölkəmizin milli maraqlarına və iqtisadi təhlükəsizliyinə cavab verən qanun layihəsi səs çoxluğu ilə təsdiq olunmuşdur.

İclasda “İcbari sığortalar haqqında” qanunun layihəsi də üçüncü oxunuşda müzakirə edilmişdir.

İqtisadi siyasət komitəsi sədrinin müavini Çingiz Əsədullayev demişdir ki, ikinci oxunuşda müzakirələrdən sonra yaradılan işçi qrupu tərəfindən layihə üçüncü oxunuş üçün əsaslı şəkildə təkmilləşdirilmişdir. Deputatların əvvəlki müzakirələrdə irəli sürdükləri bir çox təkliflər layihədə öz əksini tapmışdır. Layihəyə 4 yeni maddə əlavə edilmiş, həmçinin 20 maddəyə redaktə xarakterli dəyişikliklər olunmuşdur.

Deputatlar qanun layihəsini üçüncü oxunuşda qəbul etmişlər.

Milli Məclisin aqrar siyasət komitəsinin sədri Eldar İbrahimov “Avropa Landşaft Konvensiyasının təsdiq edilməsi haqqında” qanunun layihəsi barədə məlumat vermişdir. Bildirilmişdir ki, Avropa Şurasına üzv olan ölkələr tərəfindən 2000-ci il oktyabrın 20-də Florensiya şəhərində imzalanan Konvensiya Milli Məclisə Azərbaycan Prezidenti tərəfindən qanunvericilik təşəbbüsü qaydasında təqdim edilmişdir. Konvensiyaya qoşulan hər bir ölkə onun həyata keçirilməsini öz siyasətinə uyğunlaşdırmalıdır. Eyni zamanda Konvensiyaya qoşulan ölkələr qanunvericilikdə landşaftları insanların ətraf mühitin mühüm komponenti kimi tanımaq, landşaftın mühafizəsi, idarə olunması və planlaşdırılmasına yönəlmiş siyasəti həyata keçirmək və s. öhdəliklər götürürlər.

Deputatlar Azərbaycan xalqının milli maraqlarına tam cavab verən bu layihəni təsdiq etmişlər.

İclasda “Azərbaycan Respublikası və Mərakeş Krallığı arasında cinayət işləri üzrə qarşılıqlı hüquqi yardım haqqında” Müqavilənin təsdiq edilməsi barədə”, “Azərbaycan Respublikası və Mərakeş Krallığı arasında mülki və ticarət işləri üzrə hüquqi əməkdaşlıq haqqında” Müqavilənin təsdiq edilməsi barədə” və “Azərbaycan Respublikası və Mərakeş Krallığı arasında təslim etmə haqqında” Müqavilənin təsdiq edilməsi barədə” qanun layihələrinə də müsbət münasibət bildirilmişdir.

Sonra iclasda “Azərbaycan Respublikasının beynəlxalq müqavilələrinin bağlanması, icrası və ləğv edilməsi qaydaları haqqında” Qanuna dəyişikliklər edilməsi barədə” qanun layihəsinə baxılmışdır. Layihə ilə bağlı deputat Gülər Əhmədova məlumat vermişdir. Layihənin 2-ci maddəsinə təklif edilən dəyişikliyə əsasən Azərbaycan Respublikasının müvafiq icra hakimiyyəti orqanları tərəfindən bağlanan beynəlxalq müqavilələrin də hökumətlərarası müqavilə sayılması nəzərdə tutulur.

Qanun layihəsi təsdiq olunmuşdur.

“Nəqliyyat haqqında”, “Prokurorluq haqqında” və “Azərbaycan Respublikasının Mərkəzi Bankı haqqında” qanunlara da eyni mahiyyətli dəyişikliklər edilmişdir.

Regional məsələlər komitəsinin üzvü Tahir Rzayev “Bələdiyyələrin əraziləri və torpaqları haqqında” Qanuna əlavə edilmiş “Azərbaycan Respublikasında bələdiyyələrin siyahısı”nda dəyişiklik edilməsi barədə” qanun layihəsini diqqətə çatdırmışdır. Bildirilmişdir ki, layihəyə əsasən “Azərbaycan Respublikasında bələdiyyələrin siyahısı”nın “Şabran rayonu” bölməsinin 20.14-cü maddəsində “Təzəkənd” sözünün hər iki halda “Dəvəçi” sözü ilə əvəzlənməsi nəzərdə tutulmuşdur. Qanun layihəsi təsdiq olunmuşdur.

İclasda “Vətəndaşların müraciətlərinə baxılması qaydası haqqında”, “Əhalinin sağlamlığının qorunması haqqında”, “İnformasiya əldə etmək haqqında”, “İcra haqqında” qanunlara, İnzibati Xətalar, Mülki Prosessual və Ailə məcəllələrinə də dəyişikliklər olunmuşdur.

Daha sonra iclasda “Xəzər dənizinin Azərbaycan sektorunda Azəri, Çıraq yataqlarının və Günəşli yatağının dərinlikdə yerləşən hissəsinin birgə işlənməsi və neft hasilatının pay bölgüsü haqqında Azərbaycan Respublikasının Dövlət Neft Şirkəti ilə Amoko Kaspian Si Petroleum Limited, Bi-Pi Eksploreyşn (Kaspian Si) Limited, Delta Nimir Xəzər Limited, Den norske stats olyeselskap a.s., LUKoyl Səhmdar Cəmiyyəti, MakDermott Azərbaycan İnk., Pennzoyl Kaspian Korporeyşn, Remko Xəzər Enerci Limited, Türkiye Petrolleri A.O., Yunokal Xəzər, Ltd arasında Saziş”ə Birinci Qoşmanın qəbul və təsdiq edilməsi, həyata keçirilməsinə icazə verilməsi barədə” qanun layihəsi müzakirəyə çıxarılmışdır.

Milli Məclis sədrinin müavini, parlamentin təbii ehtiyatlar, energetika və ekologiya komitəsinin sədri Valeh Ələsgərovun ətraflı məlumatından sonra qanun layihəsi təsdiq olunmuşdur.

İclasda son olaraq “Azərbaycan Respublikasının Cinayət Məcəlləsində dəyişikliklər edilməsi haqqında” qanunun layihəsi müzakirə edilmişdir.

Layihə barədə hüquq siyasəti və dövlət quruculuğu komitəsinin sədri Əli Hüseynli məlumat vermişdir. Müzakirə zamanı deputatlar layihəni yüksək qiymətləndirmişlər. Yekunda qanun layihəsi təsdiq olunmuşdur.

Gündəlikdəki məsələlərin müzakirəsi başa çatdıqdan sonra Milli Məclisin sədri Oqtay Əsədov parlamentin növbədənkənar sessiyasının başa çatdığını bildirmişdir. Milli Məclisin həm 2011-ci ilin yaz, həm də növbədənkənar sessiyalarında məhsuldar işlədiyini vurğulayan sədr buna görə deputatlara minnətdarlıq etmişdir.

Oqtay Əsədov Milli Məclisin növbədənkənar sessiyasını bağlı elan etdikdən sonra Azərbaycan Respublikasının dövlət himni səsləndirilmişdir.