SİYASƏT
Milli Mətbuat Günü Lənkəranda da qeyd edilmişdir
Lənkəran, 22 iyul (AZƏRTAC). Milli Mətbuat Günü Lənkəran şəhərində də geniş qeyd olunmuşdur.
AZƏRTAC xəbər verir ki, rayonda nəşr olunan qəzet və jurnalların əməkdaşlarının, cənub bölgəsində fəaliyyət göstərən KİV-lərin təmsilçilərinin və ictimaiyyətin nümayəndələrinin iştirakı ilə iyulun 22-də keçirilmiş tədbirdə çıxış edənlər mətbuat işçilərini əlamətdar gün münasibətilə təbrik etmişlər.
Azərbaycan milli mətbuatının yaranmasının 137-ci ildönümünün Lənkəran rayonunda da geniş qeyd olunduğunu bildirən natiqlər əsası “Əkinçi” qəzetinin nəşri ilə qoyulan milli mətbuatımızın inkişafı tarixindən danışmışlar.
Qeyd olunmuşdur ki, dövlət müstəqilliyimizin bərpasından sonra Azərbaycanda KİV-lərin sərbəst fəaliyyəti üçün əlverişli şərait yaradılmış, plüralizm, söz və mətbuat azadlığına mane olan senzura ləğv edilmiş, mətbuatın fəaliyyətini tənzimləyən qanunvericilik bazası yaradılmışdır.
Prezident İlham Əliyevin sərancamları ilə KİV-lər əlavə dəyər vergisindən, qəzetlər “Azərbaycan” nəşriyyatına olan borclardan azad edilmiş, ölkəmizdə KİV-lərin İnkişafına Dövlət Dəstəyi Fondu yaradılmış, mətbuat işçilərinə yardımlar edilmişdir.
Tədbirdə ümummilli lider Heydər Əliyevin milli mətbuata göstərdiyi qayğıdan danışılmışdır. Vurğulanmışdır ki, bu gün Prezident İlham Əliyev Azərbaycanda söz azadlığının qorunmasında, mətbuatın maddi-texniki bazasının möhkəmləndirilməsində, KİV-lərə dövlət dəstəyinin gücləndirilməsində ulu öndərin ideyalarına sadiqlik nümayiş etdirir.
Sonda bir qrup KİV nümayəndəsinə Lənkəran Şəhər İcra Hakimiyyətinin fəxri fərmanları və mükafatları təqdim edilmişdir.