MİLLİ MƏTBUAT GÜNÜ QEYD EDİLDİ
AZƏRTAC-ın müxbiri xəbər verir ki, Mətbuat Şurasının sədri Əflatun Amaşov tədbiri açaraq hamını Milli Mətbuat günü münasibətilə təbrik etdi.129 il əvvəl Həsənbəy Zərdabi tərəfindən nəşr edilən “Əkinçi”nin ilk sayının çapdan çıxması ilə Azərbaycan milli mətbuatının təməli qoyulduğunu nəzərə çatdırdı.
Mətbuatımızın tarixi haqqında qısa məlumat verən natiq hazırda Azərbaycan dövləti kimi mətbuatımızın da azad və müstəqil olduğunu söylədi. Qeyd edildi ki, son zamanlar mətbuatın inkişafı ilə əlaqədar Qanun və fərmanlar qəbul edilmiş, KİV-lər üzərindən əlavə dəyər vergisi götürülmüşdür. Ə.Amaşov bütün bunları 2002-ci ildə “Jurnalistlərin dostu” adına layiq görülmüş ümummilli liderimiz Heydər Əliyevin mətbuata diqqətinin nəticəsi olduğunu xüsusi vurğuladı.
Prezident Administrasiyası ictimai siyasi şöbəsinin müdiri Əli Həsənov mətbuatımızın böyük ənənələri olduğunu, həmişə xalqa xidmət etdiyini söylədi. Natiq XX əsrin axırlarında müstəqilliyini əldə etmiş Azərbaycanda milli mətbuatın Ü.Hacıbəyov, C.Məmmədquluzadə, Ə.Ağayev ənənələrinin davam etdirilməsinin zəruriliyini vurğuladı. Mətbuatımızın inkişafi ilə əlaqədar dahi rəhbərimiz Heydər Əliyevin dörd fərman imzaladığını söyləyən Ə.Həsənov, Azərbaycan Prezidenti İlham Əliyevin mətbuata qayğı ılə yanaşdığını qeyd etdi.
Tədbirdə Yaponiyanın Azərbaycandakı səfiri Toşiyuki Fucivara və digər səfirliklərin nümayəndələri iştirak edirdilər.
Bölmənin digər xəbərləri
