Oktyabrın 11-də Milli Olimpiya Komitəsinin Prezidenti, Milli Məclisin deputatı İlham Əliyev MOK-un inzibati binasında Azərbaycan Milli Olimpiya Komitəsinin 10 illiyi münasibətilə təntənələrdə iştirak etmək üçün respublikamıza gəlmiş qonaqlarla görüşmüşdür. 

İlham Əliyev qonaqları səmimiyyətlə salamlayaraq, Beynəlxalq Olimpiya Komitəsinin vitse-prezidenti Vitali Smirnova, Avropa Olimpiya Komitəsinin vitse-prezidenti Aleksandr Kozlovskiyə, Rusiya, Türkiyə, Moldova, Litva, Belarus, Gürcüstan milli olimpiya komitələrinin nümayəndələrinə MOK-un 10 illiyinə həsr olunmuş təntənələrdə iştirak etmək üçün Azərbaycana gəldiklərinə görə təşəkkür etdi. İlham Əliyev MOK-un yaradılması tarixindən danışaraq bildirdi ki, Azərbaycan MOK digər keçmiş SSRİ respublikalarındakı qurumlarla eyni tarixə malikdir. Sovet İttifaqı dövründə idman hərəkatında yaradılmış potensial saxlanılmış və çoxaldılmışdır. Müxtəlif respublikaların nümayəndələri beynəlxalq yarışlarda bir-birinin qələbələrinə sevinirlər.

MOK-un Prezidenti Azərbaycanın böyük dostu, ötən illərdə də, indi də ölkəmizdə idmanın inkişafına kömək edən BOK-un vitse-prezidenti Vitali Smirnovun Bakıya gəlməsini xüsusi vurğuladı.

İlham Əliyev digər ölkələrin milli olimpiya komitələri ilə əməkdaşlıqdan danışaraq dedi ki, bu qurumların əsas vəzifəsi öz ölkələrində təkcə peşəkar idmanı deyil, həm də uşaq və gənclər idmanını da inkişaf etdirməkdir ki, gənclərimiz fiziki cəhətdən sağlam böyüsünlər.

Beynəlxalq Olimpiya Komitəsinin vitse-prezidenti Vitali Smirnov səmimi qəbula görə İlham Əliyevə təşəkkür edərək dedi: Həyatım elə gətirmişdir ki, 1962-ci ildə azərbaycanlılarla ilk tanışlığımdan sonra mən Azərbaycanda 50 dəfədən çox olmuşam. Azərbaycanda elə bir yer, elə bir rayon yoxdur ki, orada olmayım. Mən həm də ovçuyam və Şəkidə, Zaqatalada olmuşam. Biz azərbaycanlı dostlarımızla birlikdə burada “Kür” olimpiya bazası yaratmışdıq. Ona görə də deməyə əsasım var ki, mən Azərbaycanı yaxşı tanıyıram. Qeyd etmək istəyirəm ki, mən Azərbaycan MOK-un işi ilə tanışlıqdan sonra əmin oldum ki, son illər, həqiqətən, çox işlər görülmüşdür. Fəxr edirəm ki, milli olimpiya komitələri inkişafdadır, fəaliyyət göstərirlər. Biz hamımız birlikdə olimpiya komitələrinin müstəqilliyini qoruya bildik, çünki hər şeyi yenə də dövlətə tabe etməyə cəhdlər olmuşdur. Biz bu fikirdəyik ki, dövlət sistemi var, ictimai sistemlər var. Əgər dövlət sistemi ictimai sistemin etdiyini edə bilmirsə, onda nə üçün biri digərinə maneçilik törətməlidir? Biz sivilizasiyalı yaşamalı və daş dövrünə qayıtmağa can atmamalıyıq.

Burada, Azərbaycanda, onun rayonlarında olimpiya mərkəzləri yaradılması yaxşı haldır. Dünən mənə dedilər ki, Şəkidə də yeni mərkəz əslində hazırdır və onu Azərbaycan Prezidenti Heydər Əliyev açacaqdır. Mən xüsusi vurğulamaq istəyirəm ki, Heydər Əliyev keçmiş sovet dövlətinin də, respublikanın da görkəmli xadimidir, ona böyük hörmətim var və zənnimcə, gənclər və idmançılar üçün çox işlər görmüşdür.

Milli Olimpiya Komitəsinin inzibati binası və burada yaradılmış iş şəraiti bizi heyran etməyə bilməz. Sizi bir daha təbrik etmək istərdim. Ölkəniz artıq 4 dəfə - iki qış və iki yay Olimpiya oyunlarında müstəqil və uğurla çıxış etmişdir. Axırıncı Oyunlarda, Sidney Olimpiadasında isə böyük uğurlara nail olmuş, iki qızıl, bir bürünc medal qazanmısınız. Bu, görkəmli nailiyyətdir. Özü də, idmanın güləş və stend atıcılığı kimi növlərində.

Milli Olimpiya Komitəsinin prezidenti kimi şəxsən sizin gördüyünüz bütün işlərə görə Beynəlxalq Olimpiya Komitəsi adından və dostlarım adından sizə bir daha çox sağ olun demək istəyirəm və Azərbaycan idmançılarına yeni böyük uğurlar arzulayıram.

İlham Əliyev xoş sözlərə görə Vitali Smirnova təşəkkür edərək dedi ki, idman hərəkatının görkəmli xadiminin, bütün ömrü idmanla bağlı olan insanın verdiyi qiymət bizim üçün vacibdir. Biz idmançıların normal məşğul ola bilməsi üçün həqiqətən hər cür şərait yaratmağa çalışırıq. Biz Azərbaycanda idmanın kütləviliyinin bərpa edilməsinə, idmanla məşğuliyyətin cəlbedici, nüfuzlu olmasına nail olmaq istəyirik. Ona görə də biz idmanın təbliğində, idmançının nüfuzunun yüksəlməsində böyük rol oynadıqlarına görə kütləvi informasiya vasitələrimizə də minnətdar olmalıyıq. Sidney Olimpiya oyunlarından sonra bizdə gənclərin idman bölmələrinə böyük axını başlandı. Yəni idmançı olmaq şərəfli bir peşə olmuşdur.

MOK-un prezidenti İlham Əliyev Türkiyə Olimpiya Komitəsinin baş katibi Toqay Bayatlını da salamlayaraq, iki ölkənin milli olimpiya komitələri arasındakı münasibətlərə yüksək qiymət verdi və bildirdi ki, beynəlxalq turnirlərdə ölkələrimizin idmançıları görüşür və bir-birlərinin qələbələrinə sevinirlər.

Sonra Bolqarıstan Olimpiya Komitəsinin baş katibi Beltço İvanov Bolqarıstan Olimpiya Komitəsinin yüksək mükafatını - “Sülh və olimpizm” medalını, Litva Olimpiya Fondunun rəhbəri Aldimantas Qudişkis Litva Milli Olimpiya Komitəsinin ulduzunu İlham Əliyevə təqdim etdilər. Gürcüstan, Belarus və Moldova nümayəndə heyətlərinin rəhbərləri də Azərbaycan MOK-un prezidentinə xatirə hədiyyələri təqdim etdilər.

Görüşün sonunda qonaqlar Azərbaycan MOK-un muzeyinin eksponatları ilə tanış oldular və xatirə şəkli çəkdirdilər.

X X X

Sonra Milli Olimpiya Komitəsinin Prezidenti İLHAM ƏLİYEV jurnalistlərin suallarına cavab verdi.

SUAL: İlham müəllim, son illər ölkəmizdə idmanın inkişafında əldə olunan nailiyyətləri, idmançılarımızın beynəlxalq yarışlardakı uğurlarını necə qiymətləndirirsiniz?

CAVAB: Bəli, son illər əldə olunmuş nailiyyətlərin obyektiv və subyektiv səbəbləri var. Mən onları təhlil etmək istəmirəm. Sadəcə olaraq, demək istəyirəm ki, indi Azərbaycanda idman ictimai həyatın çox vacib bir amilinə çevrilibdir. İdmanda böyük uğurlar var, idmançılarımız Azərbaycanı beynəlxalq yarışlarda ləyaqətlə təmsil edirlər. Deyə bilərəm ki, elə bir yarış yoxdur ki, idmançılarımız oradan medalsız qayıtsınlar. Artıq bu, bir adətə çevrilibdir. Bəzi hallarda idmançılarımız birinci yox, ikinci yeri tutanda biz təəssüflənirik. Halbuki, beynəlxalq yarışlarda, dünya və Avropa çempionatlarında, Olimpiya oyunlarında qələbə qazanmaq çox çətin bir işdir.

Mən ilk növbədə, idmançılarımıza minnətdaram. Onların məşqçilərinə, idman mütəxəssislərinə minnətdaram ki, Azərbaycanda güclü idman məktəbi yaradılıbdır. İdmançılarımız ölkəmizin şöhrətini ucaldırlar, bayrağımızı beynəlxalq yarışlarda qaldırırlar. Bu, cəmiyyətdə vətənpərvərlik hissini də çox gücləndirir və idmançılarımız beynəlxalq yarışlardan qələbə ilə qayıdanda hər birimiz qürür hissi keçiririk. Mən bu nailiyyətləri yüksək qiymətləndirirəm. Əminəm ki, gələcəkdə də, xüsusilə Afina Olimpiya oyunlarında idmançılarımız yüksək nəticələr göstərəcəklər. İndi buna gözəl zəmin yaradılıbdır. Bir nəticə göstərmək üçün gərək bir neçə il ərzində müvafiq idman növləri üzrə gərgin iş aparılsın. Birdən-birə çempion olmaq, medal qazanmaq mümkün deyildir. İdmançıları hazırlamaq lazımdır, təlim-məşq toplanışları düzgün keçirilməlidir, idmanda elmi-metodik işlərə diqqət yetirilməlidir. Əlbəttə, gərək idmanla məşğul olması üçün şərait olsun, gənclərdə həvəs olsun. Onlar da var. Əminəm ki, yaxın gələcəkdə idmançılarımız bundan da böyük uğurlar qazanacaqlar.

SUAL: İlham müəllim, bu il Azərbaycan ictimaiyyəti Milli Olimpiya Komitəsinin 10 illiyini qeyd edir. Bərdə və Şəkidə tikilən idman kompleksləri hazırdırmı?

CAVAB: Əlbəttə, Bərdə şəhərində də, Şəki şəhərində də komplekslər hazırdır. Lənkəranda, Qubada da komplekslərin inşasına başlanıbdır. Digər şəhərlərdə də buna oxşar komplekslər yaradılacaqdır.

Bilirsiniz ki, onların hər biri dünya standartlarına cavab verir. Bizim də məqsədimiz məhz o idi ki, hər bir kompleksdə beynəlxalq yarışlar, hətta dünya çempionatları keçirmək mümkün olsun. Çünki idmanla məşğul olmaq üçün şərait olmalıdır. Keçmişdə bizim idmançılarımızın belə bir şəraiti yox idi. Buna baxmayaraq, onlar yenə də yüksək nəticələr göstərirdilər. Əminəm ki, bu şərait yaradılandan sonra nəticələr daha da yüksək olacaqdır.

Ən önəmlisi isə odur ki, uşaqlar idman bölmələrinə daha fəal şəkildə gəlməyə başlayacaqlar. Əsas məqsədimiz budur ki, Azərbaycanda idman kütləvi xarakter alsın. Hər bir uşaq, hər bir yeniyetmə, hər bir gənc idmanla məşğul olsun. Sonralar peşəkar idmana qatılmasalar da, idman hazırlığı gələcək həyatlarında onlara böyük kömək olacaqdır. Ona görə biz bu istiqamətdə fəaliyyətimizi davam etdirəcəyik, Azərbaycanın hər bir bölgəsində yeni idman kompleksləri tikəcəyik. Elə edəcəyik ki, Azərbaycan güclü idman dövlətinə çevrilsin. Artıq çevrilir və bunu davam etdirmək üçün hər cür imkanımız da var, niyyətimiz də var.

Çox şadam ki, cəmiyyətdə də idmana münasibət artıq dəyişilibdir. İdmançıya hörmət artıbdır. Bu amil də çox mühümdür. Çünki idmançı görəndə ki, onun fəaliyyəti, göstərdiyi nəticələr layiqincə qiymətləndirilir, cəmiyyət tərəfindən qəbul olunur və ona cəmiyyətdə hörmət artır, əlbəttə, bu, idmançını daha da ruhlandıracaq, həvəsləndirəcəkdir.

SUAL: İlham müəllim, 2003-cü il olimpiyaqabağıdır və ən ağır idman mövsümlərindən biri olacaqdır. Yəni lisenziyalar qazanılmağa başlanacaqdır. Bu mövsüm ərzində bizim idmançılarımız da lisenziya qazanmaq uğrunda çalışacaqlar. Milli Olimpiya Komitəsi mövsümdə hansı yeniliklərlə əlamətdar ola bilər?

CAVAB: Bilirsiniz, olimpiada ərəfəsindəki il, indiki halda 2003-cü il hər bir olimpiya komitəsi üçün çox mühümdür, o cümlədən bizim üçün də. Mənim yadımdadır, 1999-cu il də bizim üçün çox vacib idi, lisenziya ili idi. O vaxt idmançılarımız 31 lisenziya qazana bildilər. Mən hesab edirəm ki, bu dəfə lisenziyaların sayı daha da çox ola bilər. Ən önəmlisi odur ki, olimpiadada idmançılarımızın çıxışları da daha uğurlu ola bilər. Bunu deməyə hər bir əsas var. Çünki əgər müxtəlif idman növlərinə nəzər salsaq, görərik ki, boksda, qılınc oynatmada, güləşdə, cüdoda, taekvondoda, ağırlıq qaldırmada və digər idman növlərində yüksək nəticə göstərmək, qələbə uğrunda mübarizə aparmaq üçün hər bir əsasımız var.

Biz çox istəyirdik ki, lisenziya turnirlərinin biri Azərbaycanda keçirilsin. Deyə bilərəm ki, buna nail olduq. İlkin razılaşmaya əsasən, boks üzrə lisenziya turnirlərinin biri Bakıda keçiriləcəkdir. Əlbəttə, Bakıda idmançılarımıza daha gözəl imkan yaradılacaqdır. Amma əminəm ki, digər lisenziya turnirlərində də idmançılarımız yüksək nəticələr göstərəcəklər. Biz bütün lisenziya turnirlərində idmançılarımızın iştirakını təmin etməliyik. Keçən dəfə də təmin etmişdik. Bu dəfə yəqin ki, daha geniş şəkildə təmin edəcəyik. Əminəm ki, lisenziya qazanmış idmançılar sonra Afinada yüksək nəticələr göstərəcəklər.

SUAL: İlham müəllim, son illərdəki nailiyyətlərin əldə olunmasında vaxtilə Azərbaycanı tərk etmiş idmançıların vətənə dönməsi də az rol oynamır. Artıq bu müşahidə olunur və siz bunu necə qiymətləndirirsiniz?

CAVAB: Bəli, bu da bizim fəaliyyətimizin bir istiqamətidir. Mən beş il bundan əvvəl belə bir çağırış etdim ki, xaricdə çıxış edən idmançılar Azərbaycana qayıtsınlar. Onların getmələrinin də səbəbləri var idi. Çünki bilirsiniz, əgər başqa yerdə ona gözəl şərait yaradılırsa, daha böyük qayğı göstərilirsə, əlbəttə, idmançı gedib başqa ölkədə çıxış etməyə məcburdur. Mən idmançıları buna görə qınamıram. Ancaq biz istəyirdik ki, orada, digər ölkələrdə onlara yaradılan şəraiti, bəlkə də ondan da yaxşı şəraiti Azərbaycanda yaradaq ki, onlar vətənə qayıtsınlar. Belə də oldu və bu proses davam edir. Sağ olun.

AZƏRTAC

Foto Oqtay Aydınoğlunundur