SİYASƏT
Milli Təhlükəsizlik Nazirliyinin Ordubad rayon şöbəsinin inzibati binası istifadəyə verilmişdir
Naxçıvan, 11 mart (AZƏRTAC). Azərbaycan Respublikasının Prezidenti İlham Əliyev demişdir: “Ölkəmizin hərtərəfli inkişafı, Azərbaycan xalqının rifah, sülh şəraitində yaşaması üçün sabitlik, ictimai-siyasi asayiş qorunmalıdır, təhlükəsizliyimiz təmin olunmalıdır. Bu işdə Milli Təhlükəsizlik Nazirliyinin xüsusi funksiyası, xüsusi rolu var və Milli Təhlükəsizlik Nazirliyi bu vəzifənin öhdəsindən şərəflə gəlir”.
Ümummilli liderimiz Heydər Əliyevin ölkəmizə rəhbərliyi dövründə milli təhlükəsizlik orqanları sürətli inkişaf və təşkilatlanma yolu keçərək dövlətçilik ənənələrinin qorunması kimi müqəddəs amallar uğrunda aparılan mübarizənin daim ön sıralarında olmuşdur. Son illər Naxçıvan Muxtar Respublikasında da milli təhlükəsizlik orqanları əməkdaşları üçün nümunəvi iş şəraitinin yaradılması və xidmətin keyfiyyətinin yaxşılaşdırılması diqqət mərkəzində saxlanılır.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirmişlər ki, bu sahədə həyata keçirilən tədbirlərin davamı olaraq martın 11-də Naxçıvan Muxtar Respublikası Milli Təhlükəsizlik Nazirliyinin Ordubad rayon şöbəsinin yeni inzibati binası istifadəyə verilmişdir.
Muxtar respublikanın milli təhlükəsizlik naziri, general-mayor Vəli Ələsgərov açılış mərasiminə gələn Naxçıvan Muxtar Respublikası Ali Məclisinin Sədri Vasif Talıbova raport vermişdir.
Ali Məclisin Sədri zabitləri salamlamış, rəmzi açılışı bildirən lenti kəsmişdir.
Naxçıvan Muxtar Respublikası Ali Məclisinin Sədri Vasif Talıbov Milli Təhlükəsizlik Nazirliyinin Ordubad rayon şöbəsinin yeni inzibati binasının Azərbaycan Respublikası Milli Təhlükəsizlik Nazirliyinin yaradılmasının 95 illiyi ərəfəsində istifadəyə verildiyini bildirmiş, bu münasibətlə kollektivi təbrik edərək demişdir: Ölkəmizdə müxtəlif sahələr üzrə dövlət strukturları yaradılmış, onların fəaliyyətinin təşkil olunması məqsədi ilə qanunlar, normativ aktlar və əsasnamələr təsdiq olunmuşdur. Bu cür dövlət qurumlarından biri də Milli Təhlükəsizlik Nazirliyidir.
Ali Məclisin Sədri demişdir: Naxçıvan Muxtar Respublikası Milli Təhlükəsizlik Nazirliyi 1992-ci ildə ümummilli liderimiz Heydər Əliyevin Naxçıvan Muxtar Respublikasına rəhbərliyi dövründə yaradılmışdır. 2004-cü ildə nazirliyin əsasnaməsi və strukturu təsdiq edilmişdir. Bundan sonra Milli Təhlükəsizlik Nazirliyinin Ordubad Rayon bölməsi şöbəyə çevrilmişdir. Yeni əsasnaməyə uyğun olaraq nazirlik və onun rayon şöbələri qarşısında mühüm vəzifələr müəyyənləşdirilmişdir. Bu gün Azərbaycanın ayrılmaz tərkib hissəsi olan Naxçıvan Muxtar Respublikasında milli təhlükəsizliyin təmin edilməsi qarşıda duran başlıca vəzifədir.
Qeyd olunmuşdur ki, bu gün əks-kəşfiyyat və əməliyyat-axtarış fəaliyyətini təşkili, səlahiyyətlərinə aid edilmiş cinayət işləri üzrə təhqiqatların aparılması, rayonda energetika, nəqliyyat, rabitə və iqtisadiyyatın digər strateji əhəmiyyətli sahələrinin təhlükəsizliyinin təmin edilməsi üzrə tədbirlərin görülməsi, dövlət orqanlarında dövlət sirrinin mühafizəsi, qaçaqmalçılığa, narkotik vasitələrin, psixotrop, partlayıcı maddələrin və qurğuların, mədəni, tarixi və arxeoloji sərvət olan əşyaların qanunsuz dövriyyəsinə qarşı mübarizə və qanunvericiliyə uyğun olaraq digər tədbirlərin həyata keçirilməsi Ordubad rayon şöbəsinin qarşısında duran əsas vəzifələrdir. Yaradılan müasir iş şəraiti rayon ərazisində milli təhlükəsizliyin təminatına və qarşıya qoyulan bu vəzifələrin uğurlu icrasına imkan verəcəkdir. Ona görə də kollektiv dövlətimizin yaratdığı şəraitdən səmərəli istifadə etməli, öz işlərini qanunvericiliyin tələblərinə uyğun qurmalıdır.
Ali Məclisin Sədri demişdir: Ümummilli liderimiz Heydər Əliyev Azərbaycanda milli təhlükəsizlik orqanlarının fəaliyyətinin təşkilini daim diqqət mərkəzində saxlamış, bu sahənin inkişafına hərtərəfli qayğı göstərmişdir. Bu gün Ulu Öndərin müəyyənləşdirdiyi bu yolun Azərbaycan Prezidenti İlham Əliyev tərəfindən uğurla davam etdirilməsi nəticəsində ölkəmizdə milli təhlükəsizlik təmin olunmuş, sabitlik yaradılmışdır.
Ali Məclisin Sədri kollektivə qarşıya qoyulan vəzifələrin icrasında uğurlar arzulamış, binada yaradılan şəraitlə tanış olmuşdur.
Bildirilmişdir ki, 3 mərtəbədən ibarət olan bina müasir standartlar səviyyəsindədir. Otaqlar lazımi avadanlıqlar və texniki vasitələrlə təmin olunmuşdur. İdman zalında şöbənin əməkdaşlarının fiziki hazırlığının artırılması üçün hər cür şərait yaradılmış, müasir avadanlıqlar qoyulmuşdur. İkinci mərtəbədə isə 4 xidməti yaşayış mənzili istifadəyə verilmişdir.
Binada müasir istilik və işıqlandırma sistemləri quraşdırılmış, həyətdə abadlıq işləri aparılmışdır.
Ordubad şəhər 3 nömrəli tam orta məktəbi üçün
yeni bina inşa olunacaqdır
Muxtar respublikada təhsil infrastrukturunun müasirləşdirilməsi istiqamətində həyata keçirilən tədbirlər “Muxtariyyət ili” olan 2014-cü ildə də davam etdirilir. Bu il Ordubad şəhər 3 nömrəli tam orta məktəbi üçün yeni bina inşa olunacaqdır.
Martın 11-də Naxçıvan Muxtar Respublikası Ali Məclisinin Sədri Vasif Talıbov məktəb binasının mövcud vəziyyəti ilə maraqlanmış və tikinti aparılacaq əraziyə baxmışdır.
Məlumat verilmişdir ki, yeni məktəb binası 4 mərtəbədən ibarət olacaqdır. Məktəbdə fənn kabinetləri, müasir laboratoriyalar və sinif otaqları yaradılacaq, idman zalı istifadəyə veriləcəkdir.
Ali Məclisin Sədri binanın layihəsinə baxmış, tikinti işlərinə başlanılması barədə tapşırıqlar vermişdir.
Ordubad şəhərindəki “Buzaxana” memarlıq abidəsində
təmir-bərpa işləri aparılacaqdır
Tarixi özündə yaşadan abidələr həm də hər bir xalqın milli kimliyini təsdiq edir. Ona görə də muхtаr rеspublikа ərаzisində yеrləşən tаriх və mədəniyyət аbidələrinin bərpası diqqət mərkəzində saxlanılır, bu istiqamətdə ardıcıl tədbirlər həyata keçirilir. Bu il Ordubad şəhərindəki XIV əsrə aid olan “Buzxana” memarlıq abidəsində də təmir-bərpa işləri aparılacaqdır.
Martın 11-də Naxçıvan Muxtar Respublikası Ali Məclisinin Sədri Vasif Talıbov “Buzxana” memarlıq abidəsində həyata keçirilməsi nəzərdə tutulan təmir-bərpa işlərinin layihəsinə baxmışdır.
Bildirilmişdir ki, binanın ümumi hündürlüyü 11 metrdir. Abidənin əsas hissəsi yerin altında yerləşir.
Ali Məclisin Sədri təmir-bərpa işləri zamanı tarixiliyin qorunub saxlanılması barədə tapşırıqlar vermişdir.
* * *
Həmin gün Ali Məclisin Sədri Ordubad şəhərinin mərkəzindən keçən Dübəndi çayında aparılan sahilbərkitmə işləri ilə də tanış olmuşdur.
Bildirilmişdir ki, çay yatağının yuyulması nəticəsində ərazidə sürüşmə təhlükəsi yaranmışdır. Ona görə də hazırda burada sahilbərkitmə işləri görülür, suyun axımını nizamlayan beton konstruksiyalar quraşdırılır.
Aşağı Əylis kəndində kompleks
quruculuq işləri görüləcəkdir
Bu il muxtar respublikanın kompleks abadlaşan kəndləri sırasına Ordubad rayonunun Aşağı Əylis kəndi də qoşulacaqdır.
Martın 11-də Naxçıvan Muxtar Respublikası Ali Məclisinin Sədri Vasif Talıbov Aşağı Əylis kəndinə gəlmiş, kənd tam orta məktəbinin yeni binasının layihəsinə baxmışdır.
Məlumat verilmişdir ki, 3 mərtəbədən ibarət məktəb binası müasir tələblər səviyyəsində tikiləcək, sinif otaqlarında, fənn kabinetlərində, idman zalı və kitabxanada lazımi şərait yaradılacaqdır. Həmçinin məktəb müasir informasiya və kommunikasiya texnologiyaları ilə təmin ediləcək, şagirdlərin istifadəsinə kompyuterlər və elektron lövhəli siniflər veriləcəkdir.
Aşağı Əylis kəndində həyata keçiriləcək quruculuq işləri çərçivəsində yeni kənd mərkəzi də inşa olunacaq, kənddaxili yollar təmir ediləcək, elektrik və rabitə xətləri yenilənəcəkdir.
Obyektlərin layihəsinə baxan Ali Məclisin Sədri inşaat işlərinə başlanılması barədə tapşırıqlar vermişdir.