MİNGƏÇEVİRDƏ LAÇIN HƏSRƏTLİ GÖRÜŞ

18.05.2004 [13:24]
Çap et
A⁺ A^-

AZƏRTAC-ın müxbiri xəbər verir ki, Laçın rayonundakı doğma ev-eşiyindən didərgin düşmüş 220 ailə müvəqqəti olaraq Mingəçevirdə məskunlaşmışdır. Rayonun işğalının 12-ci ildönümü ərəfəsində şəhər ictimaiyyəti nümayəndələrinin bu ailələrlə görüşü olmuşdur.

Vətənimizin ərazi bütövlüyü uğrunda şəhid olanların xatirəsi bir dəqiqəlik sükutla yad edilmişdir.

İcra hakimiyyətinin başçısı Məhəbbət Qarabağlı Laçının süqutuna səbəb olan tarixi-siyasi şərait və Azərbaycan Prezidenti İlham Əliyevin ölkəmizin ərazi bütövlüyünün bərpası uğrunda məqsədyönlü fəaliyyətindən danışmışdır.

Çıxış edən laçınlılar onlara göstərilən qayğı və diqqətə görə Azərbaycan Prezidenti İlham Əliyevə və şəhər rəhbərliyinə minnətdarlıqlarını bildirmiş, doğma yurda qayıdacaqlarına inamlarını ifadə etmişlər. Sosial yönümlü problemlərdən də söz açılmışdır.

Görüşdə qaldırılan bir sıra problemlərin həlli ilə bağlı əlaqədar təşkilatlara tapşırıqlar verilmişdir.