Berlin, 21 fevral (AZƏRTAC). Azərbaycan vizası olmadan və Azərbaycanın miqrasiya qaydalarını pozaraq Xankəndinə gəlmiş qonşu Ermənistan dövləti parlamentinin sədri Ovik Abramyan Azərbaycanın bu şəhərində bildirmişdir ki, “Ermənistan-Azərbaycan münaqişəsinin həlli ilə bağlı hər hansı razılaşma Dağlıq Qarabağda yaşayan soydaşlarımız tərəfindən bəyənilməlidir”. Onun sözlərinə görə, “Dağlıq Qarabağın Ermənistanla müntəzəm və erməni tərəfinin yurisdiksiyası altında quru sərhədi olmalı, Dağlıq Qarabağ əhalisinin təhlükəsizliyinə beynəlxalq təminat verilməlidir”.

Ermənistan parlamenti sədrinin bəyanatının birinci hissəsi ilə əlaqədar ona xatırlatmaq istərdik ki, hazırda sülh danışıqları onun ölkəsinin və Azərbaycanın hökumətləri arasında aparılır. Azərbaycanın işğal olunmuş Dağlıq Qarabağ ərazisi beynəlxalq hüquq obyekti deyildir və deməli, danışıqlar prosesində tərəf kimi iştirak etmir, bu ərazinin dövlətlərarası danışıqlar prosesində veto hüququ yoxdur. Odur ki, Gorus rayonu ərazisində müvəqqəti nəzarət olunmayan Ermənistan-Azərbaycan dövlət sərhədini keçən Azərbaycan dövlətinin viza rejiminin kobud pozucusunun bu sayıqlamalarını yorğunluğun və həyəcanın ayağına yazmaq olar.

Bundan əlavə, Dağlıq Qarabağ əhalisindən danışan Abramyan “yaşamış”deyil, “yaşayan” sözünü işlədir. Ermənistan parlamentinin sədri öz torpaqlarından qovulmuş, işğal olunmuş ərazilər azad edildikdən sonra doğma yurd-yuvasına qayıdacağı günü gözləyən Dağlıq Qarabağın Azərbaycan icmasını hesabdan çox tez silir. Dağlıq Qarabağ əhalisinin ikiicmalı olması faktı həqiqətdir və Abramyan bu reallıqla barışmağa özünü məcbur etməli olacaqdır. Azərbaycan kənd və şəhərlərinin xarabalığa çevrilmiş məhəllələrini gəzmək ona bu reallığı anlamaqda kömək edər.

Ən nəhayət, onun ölkəsinin “Dağlıq Qarabağın Ermənistanla mütəmadi və Yerevanın yurisdiksiyası altında quru sərhədinin” olması arzusuna gəldikdə isə, hesab edirik ki, əgər Ermənistan paytaxtında Naxçıvan ilə Azərbaycanın qalan hissəsi arasında müntəzəm və Azərbaycan tərəfinin yurisdiksiyası altında olan quru əlaqəsi yaradılması məsələsinə baxılarsa, Bakı da bu məsələni müzakirə edə bilər. Əgər Yerevanda buna hazır deyillərsə, onun rəsmi şəxslərindən artıq dərəcədə xahiş olunur ki, aranı danışıqlar prosesinin gedişinə heç bir təsir göstərməyən arzulardan yaranmış boş bəyanatlarla qarışdırmasınlar.

Vüqar Seyidov

AZƏRTAC-ın xüsusi müxbiri

Berlin