MİRMƏMMƏD CAVAD OĞLU CAVADZADƏ
Azərbaycan elmi ictimaiyyətinə ağır itki üz vermişdir. Görkəmli uroloq-alim və pedaqoq, Dövlət mükafatları laureatı, əməkdar elm xadimi, tibb elmləri doktoru, professor, Azərbaycan Milli Elmlər Akademiyasının həqiqi üzvü, Əziz Əliyev adına Azərbaycan Dövlət Həkimləri Təkmilləşdirmə İnstitutunun rektoru Mirməmməd Cavad oğlu Cavadzadə 2008-ci il avqustun 7-də ömrünün 82-ci ilində vəfat etmişdir.
Mirməmməd Cavadzadə 1927-ci il mayın 18-də Lənkəran şəhərində anadan olmuşdur. O, Lənkəranda orta məktəbi bitirərək 1943-1948-ci illərdə Azərbaycan Dövlət Tibb İnstitutunda ali təhsil almış, 1951-1954-cü illərdə Moskva şəhərində İkinci Moskva Dövlət Tibb İnstitutunun urologiya kafedrasının aspiranturasında oxumuşdur.
Mirməmməd Cavadzadə əmək fəaliyyətinə 1948-ci ildə Astara rayonunda cərrah kimi başlamışdır. O, 1949-1950-ci illərdə Astara birləşmiş rayon poliklinikası və xəstəxanasında baş həkimin müavini, 1950-1951-ci illərdə Lənkəran şəhər xəstəxanasında cərrah olmuşdur. 1954-cü ildə Moskvada aspiranturanı bitirdikdən sonra 1957-ci ilədək Krım Tibb İnstitutunda assistent və dosent vəzifələrini tutmuş, 1957-1963-cü illərdə isə İkinci Moskva Dövlət Tibb İnstitutunda işləmişdir. 1963-cü ildə vətənə qayıdan Mirməmməd Cavadzadə Əziz Əliyev adına Azərbaycan Dövlət Həkimləri Təkmilləşdirmə İnstitutunda kafedra müdiri vəzifəsində çalışmağa başlamışdır. 1974-cü ildə görkəmli alim həmin institutun rektoru təyin olunmuş və ömrünün sonunadək bu instituta rəhbərlik edərək, qırx beş il ərzində tibb kadrlarının hazırlanması və təkmilləşdirilməsi işinə öz layiqli töhfəsini vermişdir.
Mirməmməd Cavadzadə 1954-cü ildə namizədlik, 1962-ci ildə isə doktorluq dissertasiyasını müdafiə etmişdir. O, urologiyanın problemlərinə həsr edilmiş 34 monoqrafiya və dərs vəsaitinin, 700-dən artıq elmi məqalənin müəllifidir. Alimin əsərləri respublikamızda və onun hüdudlarından kənarda mütəxəssislər tərəfindən yüksək qiymətləndirilmişdir. Onun rəhbərliyi altında 17 elmlər doktoru, 73 elmlər namizədi, yüzlərlə yüksək ixtisaslı uroloq-həkim yetişmişdir. 1966-cı ildə məhz onun təşəbbüsü və iştirakı ilə Bakıda Respublika Klinik Uroloji Xəstəxana yaradılmışdır. Qısa müddət ərzində urologiya sahəsində elmi və praktik fəaliyyətin mötəbər mərkəzinə çevrilən bu xəstəxana Azərbaycan səhiyyə sistemində xüsusi yer tutur.
Mirməmməd Cavadzadənin adı ölkəmizdə urologiya elminin inkişafı və qazandığı müvəffəqiyyətlərlə bilavasitə bağlıdır. Dünyanın bir çox ölkəsində urologiyanın aktual problemlərinə həsr olunmuş müxtəlif elmi forumlarda o, Azərbaycan tibb elmini layiqincə təmsil etmişdir. Məhz onun xidmətləri sayəsində Bakıda urologiya məsələləri ilə bağlı bir çox beynəlxalq miqyaslı mötəbər elmi konfranslar keçirilmişdir. O, Avropa Uroloqlar Cəmiyyətinin həqiqi üzvü, bir sıra xarici ölkənin urologiya cəmiyyətlərinin və akademiyaların üzvü, müxbir üzvü və fəxri üzvü seçilmişdir.
Mirməmməd Cavadzadə respublikada ictimai xadim kimi də yaxşı tanınırdı. O, 9-12-ci çağırışlar Azərbaycan Respublikası Ali Sovetinin deputatı olmuş, Azərbaycan-Fransa Dostluq Cəmiyyətinin, Azərbaycan Uroloqlar Cəmiyyətinin, digər ictimai birlik və qurumların sədri kimi fəaliyyət göstərmişdir.
Mirməmməd Cavadzadənin xidmətləri dövlət tərəfindən yüksək qiymətləndirilmişdir. O, bir sıra orden və medallara layiq görülmüş, o cümlədən müstəqil Azərbaycan Respublikasının ali mükafatları - “Şöhrət” və “İstiqlal” ordenləri ilə təltif edilmişdir.
Görkəmli alim, gözəl pedaqoq və qayğıkeş insan Mirməmməd Cavadzadənin əziz xatirəsi onu tanıyanların qəlbində daim yaşayacaqdır.
Allah rəhmət eləsin!
İlham Əliyev, Artur Rasizadə,
Oqtay Əsədov, Ramiz Mehdiyev,
Elçin Əfəndiyev, Hacıbala Abutalıbov,
Mahmud Kərimov, Fatma Abdullazadə,
Cəmil Əliyev, Oqtay Şirəliyev,
Əhliman Əmiraslanov, Ədilə Namazova,
Böyükkişi Ağayev
X X X
Mərhumun cənazəsi vidalaşmaq üçün 2008-ci il avqustun 8-də saat 14-dən 16-dək Əziz Əliyev adına Azərbaycan Dövlət Həkimləri Təkmilləşdirmə İnstitutunun binasında (Tbilisi prospekti, məhəllə 3165) qoyulacaqdır.
######
Bölmənin digər xəbərləri
